Како Русија ја промени својата тактика во војната во Украина

CNN објави видеа кои покажуваат како руски трупи се приближуваат кон разурнатиот град Покровск во источна Украина.

Конвој на руски војници се појавува од густа магла и се движи кон градот. Некои од нив се возат на мотори и мопеди; други стојат на задниот дел од дотраен пик-ап. Една група се превезува со возило опремено со необична метална конструкција налик кафез.

Иако сцената изгледа бизарно, кратката видеоснимка – поставена на социјалните мрежи и геолокализирана неколку километри од Покровск – нуди редок поглед во променетата руска тактика на бојното поле.

Ако Покровск падне, што станува сè поверојатно, тоа би бил најголемиот град што Москва го зазела по Бахмут во мај 2023 година. Иако градот е речиси целосно срамнет со земја и стратешката важност му е намалена, тој останува симбол на украинскиот отпор – исто како и Бахмут пред него.

Промена на тактиката поради доминацијата на дроновите

Главниот фактор за трансформацијата на руската тактика е масовната употреба на дронови. Новите технологии овозможуваат нивно користење на многу поголеми растојанија, со што се прошируваат „зоните на убивање“ на двете страни од фронтот и се отежнува секој напредок.

Наместо тешка оклопна техника што би тргнала во директен пробив, руските сили сè повеќе се обидуваат да навлезат во украинските позиции со лесни и нетипични возила – мопеди, мотоцикли и теренски баги возила.

Еден украински војник од 129. бригада, распоредена близу Костјантинівка, изјави дека нивниот прв контакт со Руси на баги бил „целосно неочекуван“, но тактички логичен: „Ние удираме со дронови, а ним им е полесно да се движат со лесен транспорт,“ рече тој.

Украинското Министерство за одбрана соопшти дека околу 300 руски војници се во моментот во рамките на Покровск, иако борбите продолжуваат.

Евакуацијата станува невозможна

Русија напредува кон Покровск речиси две години, по продорот кај Авдиивка во почетокот на 2024 година. Според Мејсон Кларк од Институтот за проучување на војната (ISW), Русија се обидува да ги принуди украинските сили да се повлечат или да ги опкружи – за разлика од директните урбани фронтални напади што ги водеше во Бахмут.

Иако руска опсада не е целосна, тие успеале да ги прекинат украинските снабдувачки линии.

Еден украински борбен болничар во Покровск сведочи дека медицинските евакуации се речиси невозможни. Возилата не можат да се доближат на помалку од 10–15 километри од градот без да станат цел на дронови.

„Тешко ранетите не успеваат да стигнат до стабилизациски пункт. Умерено ранетите пристигнуваат како тешки случаи, ако воопшто стигнат,“ рече тој. „Имаме луѓе кои лежат повредени две недели без можност да ги извадиме.“

Обиди со беспилотни оклопни возила исто така пропаѓаат, бидејќи тие веднаш стануваат цел на масовен руски оган, и покрај тоа што меѓународното право строго забранува напади врз медицински транспорти.

Од масовни напади до мали групи

Бахмут во 2023 година беше обележан со таканаречените „мелници за месо“ – непрекинати налети на руски пешадиски бранови со огромни човечки загуби. Но денес Русија се префрла на помали и мошне мобилни групи.

Војници од украинските единици изјавуваат дека руски јуришни тимови кои некогаш броеле по 5–7 лица, сега најчесто се движат во групи од максимум три. Ваквите мали тимови тешко се забележуваат со извидувачки дронови.

Овие мали групи продолжуваат да имаат високи загуби, но Русија смета дека ако од тријца двајца загинат, третиот можеби ќе успее да стигне до украинските позиции и да се вкопа. Украинските оператори на дронови велат дека дневно можат да минат и по сто вакви групи.

Британското Министерство за одбрана проценува дека од почетокот на инвазијата во февруари 2022 година, Русија има над 1.1 милиони загуби – убиени и ранени – од кои околу една третина само во текот на 2025 година.

Според аналитичарите, ова е можно затоа што руската армија сега прифаќа исклучително бавен темпо на напредување, за разлика од првите две години од инвазијата, кога им даваше приоритет на брзината.