Skip to content
Масакр во Краков однесе шест животи откако вооружен маж во саботата, 7 ноември, отвори оган врз случајни минувачи на главниот градски плоштад. Според најновите полски извештаи, 16 лица се повредени, вклучително и осомничениот. Истрагата доби нова димензија по откривањето уште три тела во неговиот дом во Островјец Швјентокшиски.
Полицијата претпоставува дека двете жени и мажот пронајдени во домот се неговите родители и сестра. Портпаролот на националната полиција, Анджеј Фијолек, за Полската новинска агенција нагласи дека конечната потврда ќе следува по завршувањето на постапките. Околностите на нивната смрт сè уште се утврдуваат.
За откритието доцна вчера вечер зборуваше и премиерот Доналд Туск. Тој соопшти дека службите користеле дрон за да ја проверат внатрешноста поради можни безбедносни ризици и сознанија дека таму може да има значително количество оружје.
Нападот во историскиот центар на Краков почнал околу 15 часот, во близина на улицата Славковска. Според полицијата, мажот пристигнал со автомобил и почнал да пука кон луѓето. Минувачите бегале и барале засолниште во околните кафулиња, ресторани и влезови. Полицајците го раниле и го уапсиле, по што бил пренесен во болница.
Според полициските информации што ги пренесува Ројтерс, осомничениот е 24-годишен полски државјанин. Носел облека во војнички стил, а во неговото возило биле пронајдени оружје и муниција. Полициски портпарол изјавил дека користел пушка од типот АР-15 и дека имал дозвола за оружје. Полицијата ги отфрли првичните информации за втор напаѓач.
Меѓу шестмината убиени на плоштадот се четири жени и двајца мажи. Потврдено е дека една од жртвите е британски државјанин. Повредени се и двајца полицајци, од кои еден бил во многу тешка состојба, според информациите објавени од полските власти во саботата.
Министерот за внатрешни работи Марчин Кјервински изјави дека досегашните сознанија укажуваат на влијание на крајнодесничарски идеологии врз осомничениот. Тоа е насока што службите ја истражуваат, додека конкретниот мотив сè уште не е конечно утврден. Туск го опиша нападот како терористички чин.
Полска влезе во дводневна национална жалост на 8 и 9 ноември, по одлуката што претседателот Карол Навроцки ја потпиша во саботата вечерта. Во Краков, градската жалост ќе трае до 11 ноември.
