Skip to content
Со постојаните напори на Бугарија, железничката линија Софија-Скопје веќе е вклучена за финансирање во Програмата за поврзување на Европа 2028-2034. Ова е гаранција за целосно завршување на стратешкиот Коридор 8 на бугарска територија, изјави вицепремиерот и министер за транспорт и врски Гроздан Караџов на состанокот на Советот на министри на Транспортната заедница, што се одржа денес во Брисел, пренесуваат бугарските медиуми.
На форумот присуствуваа европскиот комесар за одржлив транспорт и туризам Апостолос Зиџикостас, министри од Европската унија и земјите од Западен Балкан, претставници на ЕК и други.
Проектите на мрежата ТЕН-Т треба да дадат приоритет на зголемувањето на капацитетот по должината на коридорите север-југ, кои можат да станат двигатели на раст, одржливост и енергетска безбедност. Бугарскиот вицепремиерот повика на посилна поврзаност со Црното Море, што ќе отвори нови логистички модели, ќе поддржи коридори на солидарност и ќе го интегрира регионот во глобалните трговски текови.
„Фундаменталното прашање со кое се соочуваме денес не е само кои проекти да избереме да ги спроведеме или колку пари да мобилизираме. Треба да ги замениме независните национални напори со координирана европска акција“, рекол Гроздан Караџов.
„И покрај нашите заеднички амбиции, TEN-T премногу често функционира како збир на национални проекти, а не како единствен европски систем. Нашата задача не е само да градиме инфраструктура, туку систем што функционира како единствена мрежа“, истакнал бугарскиот вицепремиер.
Тој ја нагласил потребата од синхронизирани рокови за сите прекугранични проекти. „Напредокот од едната страна на границата не смее да биде попречен од стагнација од другата страна“, објасни тој.
Според него, интероперабилноста не може да зависи од билатерални преговори или привремени исклучоци. Таа мора да важи за секој дел од секој коридор TEN-T – од неговата почетна точка до неговата крајна точка.
