Зеленски: САД и Украина сè уште имаат различни ставови за територијалните прашања во преговорите

Украинскиот претседател Володимир Зеленски денес во Берлин, на прес-конференција со германскиот канцелар Фридрих Мерц, изјави дека Соединетите Американски Држави и Украина сè уште имаат различни ставови за територијалните прашања во преговорите за мировниот договор.

„Украина и Русија имаат различни ставови кога станува збор за териториите, но верувам дека САД, како медијатор, ќе предложат соодветни чекори за да се најде барем некаков консензус. Се надевам дека Америка ќе продолжи да посредува за овие прашања“, рече Зеленски, пренесува Украинска правда.

Тој изјави дека средбите со американската делегација, претставена од Стив Витхоф и Џаред Кушнер, продолжуваат во Берлин. Во неделата разговорите траеја повеќе од пет часа, а денес имаше неколку рунди разговори, кои ќе продолжат вечерва.

„Не сите прашања се едноставни, но некои се особено сложени, особено оние поврзани со териториите. Несомнено, сите го покренуваат прашањето и важно е сите да работиме за да се осигуриме дека ќе се реши праведно. Беше одржан опсежен дијалог за териториите и се чини дека сè уште имаме различни ставови, а верувам дека моите колеги го слушнаа мојот став“, рече Зеленски.

Тој додаде дека сите се подготвени продуктивно да работат за да најдат решенија што ја почитуваат Украина и ќе ја доведат војната до вистински крај.