Skip to content
Седницата на бугарското Народно собрание денеска беше прекината по сериозен инцидент во пленарната сала, откако дојде до физичка пресметка меѓу двајца пратеници. Во судирот биле разменети удари со раце и нозе, а причините за ескалацијата засега не се официјално разјаснети.
Според достапните снимки од салата, конфликтот започнал со вербална расправија меѓу Ѓунај Далоолу од ДПС – Нов почеток и Радостин Василев од партијата МЕЧ. По размената на остри и навредливи зборови, расправијата прераснала во физички инцидент, при што Василев го удрил Далоолу со нога во пределот на градите и се обидел да зададе удар со тупаница, кој не завршил со контакт.
Други пратеници веднаш реагирале и застанале меѓу двајцата, спречувајќи понатамошна ескалација. Претседателката на парламентот, Раја Назарјан, по инцидентот прогласи пауза и ја прекина седницата.
Во моментот на тепачката, од говорницата се обраќал министерот за енергетика Жечо Станков, кој го прекинал својот говор и ја известил претседателката дека во салата има физички конфликт меѓу пратеници.
Настанот предизвика бурни реакции во бугарската јавност и повторно ја отвори дебатата за политичката култура и безбедноста во највисокото законодавно тело на земјата. Засега нема официјални информации дали ќе бидат преземени дисциплински мерки против пратениците инволвирани во инцидентот.