Skip to content
Вториот најголем град во Украина, Харков, остана без електрична енергија по масовен руски напад изведен доцна ноќта меѓу 26 и 27 јануари, во услови на ниски зимски температури. Украинските власти соопштија дека ударите со дронови и ракети предизвикале значителна штета на енергетската инфраструктура, поради што големи делови од градот и поширокиот регион биле во мрак, а повредени се две лица и оштетени две училишта.
Според официјалните информации, околу 80 проценти од Харков и Харковската област биле без струја. Харков, кој се наоѓа на околу 30 километри од руската граница, и претходно често беше цел на напади, но овој пат последиците директно го погодија снабдувањето со електрична енергија во момент кога зимата ја зголемува зависноста од греење и стабилна инфраструктура. Надлежните служби започнале санација, но предупредуваат дека постојаната воздушна закана ја отежнува нормализацијата и го забавува враќањето на системот во полн капацитет.
Украинското воздухопловство соопшти дека Русија лансирала вкупно 165 дронови, од кои 135 биле неутрализирани од противвоздушната одбрана. Сепак, дел од леталата и ракетите погодиле критични точки, што повторно ја отвори темата за стратегијата на притисок преку енергетскиот систем – модел што, според украинските власти, има цел да ја влоши хуманитарната состојба во текот на зимските месеци.
Паралелно со Харков, масовен напад со дронови беше регистриран и во јужната Одеса, каде се повредени најмалку 23 лица, а деветмина се хоспитализирани. Меѓу повредените, според локалните власти, има две деца и една бремена жена, а постојат стравувања дека под урнатините би можело да има и затрупани лица. Нападот оштетил десетици станбени објекти, како и црква, градинка и средно училиште, а на повеќе локации избиле пожари.
Удари врз енергетската инфраструктура се пријавени и во соседната Миколаевска област, каде е повредена 59-годишна жена, како и во западната Лавовска област, во близина на границата со Полска, каде бил погоден инфраструктурен објект. Во Украина, ваквите напади се надоврзуваат на поширокиот зимски притисок врз енергетскиот систем, додека властите најавуваат дека приоритет е брзо враќање на снабдувањето и минимизирање на ризиците за цивилното население.