Русија пак го кани Зеленски да оди во Москва на мировни преговори

Кремљ соопшти дека Русија ја повторила поканата до украинскиот претседател Володимир Зеленски да дојде во Москва на мировни преговори, додека напорите предводени од САД за постигнување договор за прекин на војната во Украина се интензивираат.

Мировните преговори посредувани од Вашингтон во Абу Даби минатиот викенд дадоа нов импулс на напорите за постигнување мировен договор, но длабоките разлики меѓу преговарачките позиции на Русија и Украина остануваат, пишува Ројтерс.

Тешката битка продолжува додека Киев се бори со исцрпувачките прекини на електричната енергија предизвикани од неодамнешните напади врз енергетската инфраструктура. Неименуван американски функционер изјави за порталот Аксиос дека Зеленски и рускиот претседател Владимир Путин се „многу блиску“ до договор за средба по неодамнешната рунда преговори.

Нова рунда разговори во Абу Даби меѓу руските и украинските преговарачки делегации е закажана за недела, а американскиот претседател Доналд Трамп, кој се залага за договор за прекин на најголемиот конфликт во Европа од Втората светска војна, во вторникот изјави дека во процесот се случуваат „многу добри работи“.