Skip to content
Граѓанската иницијатива „Стоп за Усје“ за денеска најави протестен марш што ќе се одржи, со цел, како што велат организаторите, да се испрати јасна порака против, според нив, штетните последици од работењето на цементарницата „Усје“ врз животната средина и здравјето на граѓаните.
Маршот, кој ќе започне во 12.00 часот пред Владата, ќе продолжи кон Собранието и ќе заврши пред Министерството за животна средина и просторно планирање, ја носи пораката за неопходност од системска одговорност.
Оваа ескалација доаѓа по претходните собири со намера да укаже дека граѓаните повеќе не ги прифаќаат институционалните оправдувања за долготрајниот молк. Организаторите инсистираат на мирен протест без партиски обележја, со што се обидуваат да ја зачуваат автентичноста на еколошката кауза и да спречат политичка инструментализација на правото на чист воздух.
Од иницијативата информираат дека маршот има за цел да ја подигне јавната свест за аерозагадувањето, управувањето со отпад и транспарентноста во работењето на индустриските капацитети. Тие бараат од надлежните институции построги контроли, целосна објава на резултатите од мерењата на емисиите и конкретни мерки за заштита на здравјето на населението.
„Ова не е протест против развојот, туку повик за одговорен развој и почитување на законите“, порачуваат од „Стоп за Усје“, нагласувајќи дека очекуваат широка поддршка од граѓаните.
Организаторите апелираат маршот да помине во мирна и достоинствена атмосфера, без инциденти, а ги повикуваат институциите да го слушнат гласот на јавноста и да преземат конкретни чекори во насока на намалување на загадувањето.