Вучиќ си посака односите меѓу Србија и Кина да напредуваат со брзина на галопирачки коњ

Српскиот претседател Александар Вучиќ по повод Кинеската Нова Година изјави дека „железното пријателство“ меѓу Србија и Кина се темели не само на политичка и економска соработка, туку и на искрени и топли чувства меѓу двата народа, изразени преку допирот на нивните култури.

Во писмото прочитано пред претставата на Кинеската национална пекиншка опера во Народниот театар во Белград, Вучиќ потсети дека Годината на коњот се приближува според лунарниот календар. Тој нагласи дека во кинеската култура коњот е симбол на храброст, виталност и напредок.

„Искрено посакувам оваа година да им донесе среќа и сила на српскиот и кинескиот народ, а односите меѓу Србија и Кина да напредуваат со брзина на галопирачки коњ“, рече Вучиќ, посакувајќи успех на претставата.

Тој нагласи дека пријателството меѓу двете земји се одразува не само во тесната политичка и економска соработка, туку и во културната размена. Според него, Пекиншката опера е ризница на традиционалната кинеска култура, која носи длабока историска и уметничка мудрост. Настанот е во духот на Иницијативата за глобална цивилизација предложена од кинескиот претседател Си Џинпинг.

„Само преку меѓусебно почитување и учење можеме заеднички да го промовираме напредокот на нашите цивилизации“, рече шефот на српската држава, додавајќи: „Нека пријателството меѓу Србија и Кина трае засекогаш“.

Настанот беше организиран во соработка со министерствата за култура на Кина и Србија, со поддршка на Кинескиот културен центар и Институтот „Појас и пат“ во Белград. На приемот присуствуваа кинескиот амбасадор Ли Мин, неколку српски министри, како и амбасадорите на Чешка и Русија.

Кина го зајакнува своето присуство на Балканот преку стратешко партнерство со Србија, која се етаблира како клучен сојузник на Пекинг во регионот. Најзначајниот заеднички проект е брзата железничка линија Белград-Будимпешта – дел од Коридорот 10, реализирана со големо кинеско финансирање и учество на кинески компании. Србија, исто така, привлече значителни кинески инвестиции во металургијата, рударството и енергетиката, вклучително и аквизиции на стратешки претпријатија. Со тоа Белград се позиционира како клучна точка на иницијативата „Еден појас, еден пат“ во Југоисточна Европа.