(ВИДЕО) Јапонија тргна по парче од месечината на Марс

Од Јапонија полета вселенско летало со необична задача – да слета на Фобос, една од двете месечини на Марс, да собере само 10 грама прашина и да ја врати на Земјата. Ако мисијата успее, тоа ќе биде првпат примерок од Марс или неговите месечини да биде донесен директно на Земјата за лабораториска анализа.

Мисијата Mars Moons Exploration (MMX), предводена од Јапонската вселенска агенција JAXA, треба да пристигне до Фобос во август 2027 година. Враќањето на примероците е планирано за 2031 година, кога капсулата со материјалот треба да слета во пустинската област Вумера во Австралија.

Фобос и Деимос се единствените две месечини на Марс. Тие се мали, неправилно обликувани небесни тела, со пречник од околу 20 и 10 километри. Научниците сè уште не знаат како настанале пред приближно 4,5 милијарди години.

Постојат две главни теории. Според првата, месечините се формирале од остатоците на огромен судир меѓу Марс и друго небесно тело. Според втората, тие се астероиди кои гравитацијата на Марс ги заробила додека минувале низ Сончевиот систем.

За да ја разреши мистеријата, леталото најпрво ќе го проучува Деимос, а потоа ќе се приближи до Фобос. Таму ќе спушти мал ровер кој ќе ја истражува површината и ќе помогне да се избере безбедно место за слетување.

Операцијата е особено сложена бидејќи Фобос има многу слаба гравитација, а во непосредна близина се наоѓа Марс, чија гравитација дополнително го отежнува маневрирањето.

По слетувањето, леталото ќе употреби роботска рака и два уреда за собирање примероци. Иако количината од 10 грама изгледа незначителна, научниците велат дека и поединечни зрнца можат да откријат важни информации за хемискиот и минералниот состав на месечината.

Постои и можност примероците да содржат честички од самиот Марс. При удари на астероиди во површината на планетата, дел од материјалот може да биде исфрлен во вселената и да заврши на Фобос.

Тоа значи дека мисијата би можела да донесе не само прашина од месечината, туку и траги од геолошката историја на Марс.

Досега на Земјата пристигнувале само марсовски метеорити, кои по падот биле изложени на земјината атмосфера и околина. Примероците од MMX, пак, би биле собрани и заштитени во контролирани услови, што ќе овозможи многу попрецизни анализи.

Мисијата доаѓа во време кога американскиот проект за враќање примероци од Марс се соочува со прекин на финансирањето, додека Кина планира сопствена мисија за собирање марсовски материјал во 2028 година.

Десетте грама прашина што Јапонија планира да ги донесе во 2031 година би можеле да дадат одговор како настанале месечините на Марс.