Руте за Шекеринска во Собранието: Таа беше мој избор со стратегиска тежина

Денеска пред пратениците во Собрание на Република Северна Македонија, генералниот секретар на НАТО, Марк Руте, истакна дека лично ја избрал Радмила Шекеринска за улогата заменик-генерален секретар на Алијансата, потенцирајќи ја нејзината експертиза и важноста што ја носи за алијансата во време на безбедносни предизвици ширум Европа.

Тој изрази благодарност до Шекеринска за знаењето и искуството што таа ги носи во НАТО кои, како што рече, се од големо значење и за него и за Алијансата, кога се разгледуваат и се решаваат безбедносните предизвици за нашиот регион и подалеку.

„Како што знаете, Радмила беше член на ова Собрание и служеше во Владата на Северна Македонија. Таа беше одличен избор за да се придружи на водечкиот тим на НАТО. И можам да го кажам тоа со сигурност бидејќи моја беше одлуката да ја назначиме. И многу сум горд на тоа“, рече Руте од собраниската говорница.

Според него, нејзиното знаење „е од големо значење кога се разгледуваат и решаваат безбедносните предизвици“ и дека неговиот избор е лична, но и стратешка одлука во интерес на НАТО.

Шекеринска, која е првата жена од Западен Балкан што ја носи оваа висока позиција во НАТО, долги години работеше на евроатлантските интеграции на Северна Македонија, вклучително и во процесот на пристапување на земјата во Алијансата.