Skip to content
Див пешачки премин на Бит Пазар засега го доби првото полувреме против градоначалникот на Скопје, Орце Ѓоргиевски, откако обидот на градските власти да го затворат преминот заврши со отпор, протест и блокада, а најавеното „решавање на проблемот“ остана во фаза на изјави, средби и нови планови.
Ѓоргиевски тврди дека безбедноста на граѓаните е врвен приоритет и дека нема да има компромис со дивиот премин кај Бит Пазар. Според него, постојат две можни решенија: преминот да се легализира според законските прописи и да се отстрани натпатникот за да се добие соодветно сообраќајно решение, или натпатникот да стане функционален, а нелегалниот премин да биде затворен.
Но на терен, резултатот засега е поинаков. Градските служби не успеаја да го затворат преминот, бидејќи граѓани и дуќанџии се спротивставија на поставувањето ограда. Наместо финален свиреж за дивиот премин, Бит Пазар виде уште една урбана драма во која законот, навиките, безбедноста и секојдневната потреба на луѓето се судрија среде булевар.
Градоначалникот најави дека ќе разговара со министерот за внатрешни работи и со градоначалникот на Чаир, Изет Меџити, за да се најде решение. Тој вели дека Градот постапува според закон и дека правилата мора да важат еднакво за сите, без повластени групи и без исклучоци.
Во фудбалски речник, Ѓоргиевски најавува пресврт во второто полувреме. Вели дека до него стигнале повеќе од сто барања од граѓани загрижени за безбедноста на оваа локација и дека нема да дозволи нечиј живот да биде доведен во опасност. Посочи дека во близина има факултет, дека минуваат деца и дека и самиот со семејството се движи таму.
Но проблемот не е само во оградата. Ако дивиот премин е опасен, граѓаните очекуваат функционална алтернатива, а не само забрана. Ако натпатникот не е употреблив, ако пристапот е тежок за постари лица, родители со колички или лица со попреченост, тогаш секое затворање без решение ризикува да создаде нов конфликт.
Засега семафорот за Град Скопје не е зелен. Ѓоргиевски ја има иницијативата, но дивиот пешачки премин сè уште стои на теренот. Резултатот е 0:1, а реваншот ќе зависи од тоа дали градските власти ќе понудат вистинско сообраќајно решение или само уште една прес-конференција со ветување за ред.
