Skip to content
Омилениот остров на Европејците, Кипар, влегува во летната сезона со сериозен туристички удар, откако авиокомпаниите скратиле околу 600.000 седишта кон аеродромите во Ларнака и Пафос за периодот од април до октомври, што може да значи околу 450.000 патници помалку во споредба со очекувањата.
Кипар со години важи за една од најпосакуваните медитерански дестинации за европските туристи, но годинава сезоната почнува под силен притисок. Причината не е само цената на патувањата, туку и растечката претпазливост кај патниците поради регионалната нестабилност околу Блискиот Исток.
Според податоците што ги пренесуваат кипарските извори, намалувањето на авиокапацитетот изнесува околу пет проценти од летната понуда. Тоа не значи целосно повлекување на авиокомпаниите, туку намалување на бројот на летови на постојните рути. Сепак, за туристичка економија како кипарската, и таков пад може да остави видливи последици врз хотелите, угостителството, транспортот и локалниот бизнис.
Првите сигнали веќе се почувствувале во април, кога бројот на пристигнувања бил намален за 16 проценти во споредба со истиот месец лани, односно за околу 95.000 патници помалку. Во истиот период, пополнетоста на авионите паднала на 76 проценти, пред подоцна повторно да се подобри на 80 до 85 проценти.
И покрај ударот, Кипар не останува без туристичка поврзаност. Летово 54 авиокомпании треба да го поврзуваат островот со 165 дестинации во 42 земји. Пазарите како Обединетото Кралство и Полска и натаму покажуваат силен интерес, со висока пополнетост на летовите.
Но, бројката од 450.000 очекувани патници помалку ја менува атмосферата пред шпицот на сезоната. За остров кој минатата година привлекол милиони туристи и чие стопанство силно се потпира на туризмот, ова лето ќе биде тест не само за хотелите и авиолиниите, туку и за сликата на Кипар како сигурна медитеранска дестинација.
