Skip to content
На 10 дена до 11 јуни, започнуваме секојдневен серијал патувања низ најновите вести, инсајдерски информации и случувања кои го одбележуваат периодот пред почетокот на историското Светско првенство во САД, Канада и Мексико!
Од денес, па сè до свеченото отворање на 11 јуни, секој ден во исто време ќе ве информираме за сè што се случуваше во изминатите 24 часа.
Еве што го брануваше фудбалскиот свет во последното деноноќие:
Скандал со билетите: ФИФА под истрага во САД!
Најжешката вест во изминатите 24 часа доаѓа од канцелариите на обвинителите во Њујорк и Њу Џерси. ФИФА доби официјални судски повици (судски налози) поради нивната контроверзна политика на т.н. „динамично одредување на цените“ на билетите. Надлежните ја обвинуваат куќата на фудбалот дека вештачки создава привид на дефицит на билети за енормно да ги покачи цените, претворајќи го сонот на навивачите во вистински финансиски кошмар.
Шампионот Аргентина го „пресече“ списокот
Селекторот на актуелниот светски шампион, Лионел Скалони, во последните 24 часа го објави конечниот список на патници. Лео Меси очекувано го предводи тимот во одбрана на круната, но паднаа и големи „жртви“. Од комбинација отпаднаа неколку звучни имиња од Премиер лигата како Алехандро Гарначо (Челси), Еми Буендија (Астон Вила) и Николас Домингез (Нотингем Форест). „Гаучосите“ не калкулираат и одат со проверени сили во групата со Австрија, Алжир и Јордан.
Медицински билтен: Трка со времето за Нејмар и Дeјвис
Лоши вести за навивачите на Бразил и Канада.
- Нејмар (Бразил): Лекарскиот тим на „Кариоките“ потврди дека 34-годишната ѕвезда заработи повреда од втор степен на мускулот на десниот лист на ногата. Тој е под знак прашалник за првиот меч против Мароко на 13 јуни.
- Алфонсо Дејвис (Канада): Иако е вклучен во конечниот состав, неговата повреда на задната ложа сè уште не е санирана и медицинскиот тим на домаќинот одбива да гарантира дека ќе биде подготвен за самиот старт.
- Били Гилмор (Шкотска): Младиот играч за врска заработи тешка повреда на коленото на пријателскиот меч против Курасао и официјално го пропушта Мундијалот. На негово место експресно е повикан 19-годишниот тинејџер на Манчестер Јунајтед, Тајлер Флечер (син на легендата Дарен Флечер).
Денешна програма: Генерални проби ширум светот
Денеска (1 јуни) репрезентациите влегуваат во финалната фаза од подготовките, а вечерва не очекуваат неколку исклучително интересни пријателски натпревари кои служат како последен филтер за селекторите
Меѓу поинтересните натпревари што ќе се играат денеска се Австрија – Тунис, Канада – Узбекистан и Норвешка – Шведска.
Фактот на денот: За првпат во мундијалската историја, на ова Светско првенство ќе учествуваат дури 48 репрезентации, а дебитантски настап ќе забележи селекцијата на Јордан, која се наоѓа во групата со Аргентина.
