Костадиновска-Стојчевска: Светот денеска е една, голема музичка сцена на која го славиме Светскиот ден на музиката

„Светот денеска е една, голема музичка сцена на која го славиме Светскиот ден на музиката. Како универзален јазик на цивилизацијата, музиката ја имаа таа моќ да ги поврзува народите зашто заеднички и единствени се емоциите кои произлегуваат од нотите“, напиша на социјалните мрежи министерката за култура Бисера Стојчевска-Костадиновска.

Министерката за култура посочува дека „денеска музиката ги обединува и зближува луѓето од сите и на сите континенти на јавните простори исполнети со народ и ја има таа моќ да ги собира луѓето заедно при создавањето нови звучни светови какво што е секое музичко дело и во радоста на заедништвото додека се слуша и додека се танцува во нејзиниот ритам“.

„Со богатата музичка традиција и со разноличноста на музичките форми, и македонската музика е значаен дел од светската музичка ризница и затоа Министерството за култура ја дава целата поддршка за негување на музичките традиции, за поддршка на сите вредни, традиционални и нови музички форми“, нагласува во својот текст на социјалните мрежи министерката за култура Бисера Стојчевска-Костадиновска.

Министерката за култура потенцира дека „со посебно внимание сме посветени на афирмација и развојот на новата генерација музичари за да продолжат да ја следат својата страст за музиката и кои го збогатуваат нашиот живот со своите музички креации“.

„Денеска, на Светскиот ден на музиката да ја прифатиме моќта на музиката во целата нејзина разновидност на богатите култури што таа ги претставува“, пишува на социјалните мрежи министерката за култура Бисера Стојчевска-Костадиновска.