Јаневска: Насилството во школо почнува секогаш од дома

Децата најчесто не стануваат агресивни во училиштето, туку во училишните клупи доаѓаат со веќе усвоени модели на однесување од семејната средина, изјави министерката за образование и наука Весна Јаневска при промоцијата на новиот проект за спречување на насилството врз децата.

Проектот треба да воспостави систем за рано препознавање на семејното насилство и занемарувањето на децата, како и да спречи нивно пренесување во врсничко насилство во училиштата.

Според Јаневска, во активностите ќе бидат вклучени повеќе институции, граѓански организации и училишта, а проектот е предвидено да трае една година.

Следната недела треба да почнат обуките за училишните психолози, педагози и социјални работници во основното образование. Целта е стручните служби навреме да препознаат кога некое дете е жртва на насилство или занемарување и да преземат соодветни мерки.

„Децата не стануваат агресивни во училиштето, туку најчесто доаѓаат со такви модели на однесување од дома. Затоа ќе работиме на воспоставување одржлив механизам за рано препознавање, превенција и соодветно постапување“, изјави Јаневска.

Министерството најавува и дискусии со наставниците, родителите и учениците, со цел да се зголеми свеста за семејното и врсничкото насилство и да се зајакне довербата меѓу семејствата, училиштата и институциите.

Посебно внимание ќе биде посветено на охрабрувањето на учениците да зборуваат за насилството и да не ги премолчуваат случаите во кои тие или нивни соученици се жртви.

Врз основа на искуствата од обуките и дискусиите ќе биде изработен единствен протокол за постапување при сомнеж за насилство. Протоколот треба да содржи и алатки за проценка на ризикот, со кои училиштата ќе добијат јасни насоки како да реагираат.

Во проектот ќе учествуваат и Министерството за социјална политика, демографија и млади, Министерството за внатрешни работи и Комората на психолози.

Од Министерството за образование очекуваат новиот механизам да овозможи подобра координација меѓу училиштата и надлежните служби, како и побрзо откривање и спречување на насилството врз децата.