Skip to content
Екстремниот топлотен бран што ја зафати Европа носи рекордни температури, нарушувања во секојдневниот живот и растечки број жртви. Франција пријавува десетици смртни случаи, додека Шпанија отвора специјални климатски засолништа за најранливите граѓани.
Европа се соочува со еден од најинтензивните топлотни бранови во последните години, при што екстремно високите температури веќе предизвикаа десетици жртви, прекини во сообраќајот, затворање училишта и воведување вонредни мерки во повеќе држави. Најтешко погодени се Франција, Шпанија, Италија, Велика Британија и Швајцарија, каде температурите на некои места достигнуваат и над 40 Целзиусови степени.
Во Франција, според најновите податоци, најмалку 40 лица се удавиле во последните денови обидувајќи се да се разладат од жештините, додека претходните извештаи говореа за најмалку 18 починати лица, меѓу кои и две мали деца кои биле пронајдени без знаци на живот во автомобил оставен на сонце. Француските власти предупредуваат дека бројот на жртви може дополнително да расте.
Голем дел од Франција се наоѓа под највисоко ниво на метеоролошка тревога. Во одредени региони температурите достигнуваат до 43 степени Целзиусови, а земјата неодамна ги регистрираше најтоплиот ден и најтоплата ноќ откако се водат метеоролошки мерења. Дури 54 департмани се под црвен аларм поради жештините, што француските метеоролози го опишуваат како ситуација без преседан.
Последиците веќе се чувствуваат и врз економијата. Компании воведуваат посебни мерки за заштита на работниците, а железнички линии, вклучително и дел од меѓународните врски, се соочуваат со доцнења и откажувања поради високите температури.
Во Шпанија ситуацијата е исто така сериозна. Државната метеоролошка служба издаде црвени предупредувања за повеќе региони, а на некои места температурите се очекува да достигнат и до 44 степени Целзиусови. Особено загрижува фактот што ноќните температури остануваат над 25 степени, што не им дозволува на луѓето и инфраструктурата да се разладат.
Како одговор на кризата, властите во Мадрид отворија таканаречени „климатски засолништа“ за ранливите категории граѓани, особено за бездомниците и повозрасните лица. Во овие објекти посетителите можат да престојуваат во климатизирани простории, да добијат храна, вода, можност за туширање и краток одмор од екстремните временски услови.
Експертите објаснуваат дека актуелниот топлотен бран е предизвикан од таканаречен „Омега блок“, атмосферски феномен при кој врел воздух останува заробен над големи делови од Европа. Дополнително, топли воздушни маси од Сахара се движат кон север, што доведува до континуиран раст на температурите.
Според податоците на Светската метеоролошка организација, Европа се затоплува повеќе од двапати побрзо од глобалниот просек, поради што ваквите долготрајни и интензивни топлотни бранови стануваат сѐ почести. Научниците предупредуваат дека климатските промени значително ја зголемуваат веројатноста за вакви екстремни временски појави.
