Skip to content
Парадата во Берлин, позната како „Кристофер стрит деј“, се одржа вчера, на 25 јули, како политички марш и масовна прослава на еднаквоста, слободата и правата на ЛГБТИ+ заедницата. На 48. издание учествуваа стотици илјади луѓе и околу 80 возила, а поворката се движеше од Лајпцигер штрасе, преку центарот на градот, до завршниот собир кај Бранденбуршката порта. Мирниот настан доби трагичен крај околу 22 часот, кога возило влета меѓу луѓето во блискиот парк Тиргартен, при што едно лице загина, а 16 беа повредени.
Според првичните информации од берлинската полиција, бело возило се движело по патека во паркот и удрило повеќе луѓе, пред да се забие во дрво. Возачот го напуштил оштетеното возило и избегал во непознат правец, по што започнала голема полициска потрага.
Од 16 повредени, тројца се во животна опасност, осуммина се тешко повредени, а пет лица добиле полесни повреди. Сите биле пренесени во болница, додека десетици сведоци и присутни добиле психолошка помош на местото на нападот.
Истражителите проверуваат дали по ударот со возилото следувала и втора фаза на нападот. Сведоци пријавиле дека едно или повеќе лица можеби излегле од возилото и нападнале присутни со остар предмет, но полицијата сè уште не го потврдила конечниот тек на настаните.
Полицијата и обвинителството објавија фотографија и потерница по 21-годишен осомничен, за кого предупредија дека може да биде вооружен и опасен. Тој им бил познат на безбедносните служби поради поврзаност со исламистички кругови во Берлин, но мотивот за нападот сè уште не е официјално утврден.
Завршната програма и концертите кај Бранденбуршката порта биле веднаш прекинати, а организаторите ги повикале присутните да се упатат дома и да го избегнуваат Тиргартен. Берлинскиот градоначалник Каи Вегнер го оцени настанот како напад врз слободното и отворено општество.
