Skip to content
Раководството на ФИФА му изрази целосна поддршка на претседателот Џани Инфантино по кризниот состанок во Рабат, свикан поради неуспешниот план за вклучување приватни инвеститори во комерцијалните права на организацијата.
По состанокот во Мароко, ФИФА призна дека биле направени процедурални и комуникациски грешки при подготовката на проектот „FIFA Forward Enterprise“, како и по протекувањето на информациите во јавноста. До Советот на ФИФА и до 211-те национални федерации било испратено извинување со уверување дека ваквите пропусти нема да се повторат.
Од ФИФА соопштија дека Советот и членките не требало да се почувствуваат исклучени од процесот и дека проектот требало да биде воден поинаку. Организацијата најави внатрешна проверка, а извештајот ќе биде доставен на следната седница на Советот.
Предлогот предвидувал формирање посебна компанија за управување со комерцијалните права и натпреварувањата на ФИФА, во која на приватни инвеститори би им бил понуден удел од 20 проценти. Проектот, кој според процените можел да донесе околу 4,2 милијарди долари, беше повлечен по силните реакции од фудбалските конфедерации и други засегнати страни.
И покрај признатите грешки, генералниот секретар Матијас Графстром и присутните членови на раководството ја потврдиле поддршката за Инфантино, нагласувајќи дека тој е единствениот функционер директно избран од сите 211 членки на ФИФА. Инфантино возвратил со поддршка за генералниот секретар и администрацијата.
ФИФА соопшти дека сите активности околу повлечениот проект биле спроведени во согласност со нејзината регулаторна рамка. Организацијата најави и дека ќе преземе мерки за заштита на својот углед од напади врз нејзиниот интегритет и начинот на управување.
Проектот предизвика критики од УЕФА, професионалните фудбалски лиги и повеќе национални федерации поради недостигот од транспарентност и вклученост во процесот. Од иницијативата јавно се огради и директорот за глобален развој на фудбалот Арсен Венгер, додека советникот на Инфантино, Карлос Кордеиро, поднесе оставка.
ФИФА потврди дека проектот „FIFA Forward Enterprise“ е целосно повлечен и повеќе нема да биде разгледуван во предложената форма.
