Skip to content
Русија развива сопствена сателитска интернет-мрежа која треба да стане домашна алтернатива на Starlink на Илон Маск. Системот „Расвет“, зад кој стои компанијата Bureau 1440, треба да почне со комерцијални услуги во 2027 година.
Планот предвидува до 2030 година мрежата да има 292 сателити, а подоцна, зависно од побарувачката, бројката би можела да порасне до 924.
Компанијата најавува интернет со брзина до 1 Gbps и латенција до 70 милисекунди. Сателитите ќе работат во ниска Земјина орбита и ќе комуницираат меѓусебно преку ласерски врски.
Милијарди за рускиот одговор на Starlink
Во проектот се планирани повеќе милијарди долари државни и приватни инвестиции. Целта е „Расвет“ да обезбеди интернет во оддалечените делови на Русија, но и да се користи во мобилните мрежи, возовите и авионите.
Русија со тоа сака да ја намали зависноста од странска сателитска инфраструктура, особено по искуствата од војната во Украина, каде Starlink има значајна улога во комуникациите.
Сепак, разликата и натаму е огромна. Starlink веќе располага со илјадници сателити и глобална корисничка база, додека „Расвет“ сè уште е во рана фаза на развој.
Но, Москва очигледно има амбиција да изгради сопствен систем кој во иднина би можел да му конкурира на најпознатиот сателитски интернет во светот.
