Skip to content
Огромен црн цилиндар донесен од морските струи се насука на преполната плажа во италијанскиот град Аласио, предизвикувајќи љубопитност, бројни претпоставки и интервенција на крајбрежните служби. Предметот е идентификуван, но мистеријата околу неговото потекло сè уште не е целосно разрешена.
Необичната сцена се појавила во неделата, на 23 август, во близина на пристанишниот мост „Бестозо“. Меѓу чадорите и лежалките, капачите затекнале масивен црн предмет со цилиндрична форма, кој поради димензиите повеќе личел на дел од пловило отколку на обичен отпад исфрлен од морето.
Фотографиите и снимките брзо се прошириле на социјалните мрежи. Додека едни претпоставувале дека станува збор за дел од брод, други се прашувале дали морето исфрлило парче од некоја поголема конструкција.
На плажата пристигнале претставници на пристанишната капетанија, Крајбрежната стража и локалната полиција. Просторот бил обезбеден, а надлежните утврдиле дека црниот цилиндар е огромен пневматски одбојник каков што се користи во пристаништата и на големи бродови.
Неговата задача е да го ублажи ударот меѓу трупот на бродот и пристанишниот кеј при пристигнување и закотвување. Вакви одбојници се користат кај големи товарни и контејнерски бродови, но и кај крузери.
Италијанските локални власти соопштија дека предметот стигнал од источниот дел на морето, носен од струите. Се појави претпоставка дека можеби се откачил во пристаништето Вадо Лигуре, но за тоа нема официјална потврда. Не е утврдено ниту на кој брод или пристаниште му припаѓал.
И покрај големината и тежината, одбојникот не повредил никого и не предизвикал штета на пловилата или на плажата.
Поради неговите димензии, отстранувањето не било едноставно. Општината во Аласио и компанијата „Марина ди Аласио“ организирале ноќна операција за да не ги попречат капачите и туристичките активности. Предметот бил издишан, а потоа отстранет од плажата пред зори, без оштетување на околината и крајбрежните објекти.
Црниот цилиндар повеќе не е на песокот, но последното прашање остана отворено: кој го загубил огромниот пристаништен одбојник и колкав пат минал низ Лигурското Море пред да заврши меѓу капачите во Аласио?
