Skip to content
Бројот на нерегуларни преминувања на надворешните граници на Европската Унија значително се намалил во првите осум месеци од годинава. Фронтекс регистрирал нешто повеќе од 74.000 случаи, што е пад од 35 проценти во споредба со истиот период во 2025 година.
Според европската гранична агенција, намалување е забележано на речиси сите главни миграциски рути. Најголем пад има на централната медитеранска рута, каде бројот на регистрирани преминувања е намален за 55 проценти, на околу 19.400.
Фронтекс оценува дека падот е поврзан со засилената соработка со земјите-партнери и со превентивните мерки во државите од кои тргнуваат мигрантите. Сепак, агенцијата предупредува дека помалиот број преминувања не значи и исчезнување на шверцерските мрежи.
Најголем дел од нерегуларните влезови и натаму се одвиваат преку Средоземното Море. Источната медитеранска рута, од Турција кон Грција, и централната рута, од Либија и Тунис кон Италија и Малта, заедно сочинуваат речиси 60 проценти од сите регистрирани случаи.
Пад има и на западнобалканската рута. Во првите седум месеци таму биле регистрирани 4.910 нерегуларни преминувања, што е за 26 проценти помалку од истиот период минатата година.
Фронтекс, сепак, нагласува дека статистиката за првите осум месеци не го опфаќа целосно големиот миграциски бран кон шпанската енклава Сеута на крајот на јули.
Шпанските власти проценија дека околу 80.000 луѓе привремено влегле во Сеута, додека Мароко наведува бројка од околу 40.000. Голем дел од нив подоцна се вратиле во Мароко без да бидат формално регистрирани, поради што конечниот број не може прецизно да се вклучи во статистиката на Фронтекс.
Во обидите за преминување кон Сеута загинале 83 лица, а инцидентот повторно ја отвори дебатата во ЕУ за контролата на надворешните граници и способноста на системот да реагира на ненадејни масовни движења.
Од Фронтекс предупредуваат дека токму настаните во Сеута покажуваат колку брзо може да се промени состојбата, дури и во период кога вкупниот миграциски притисок е значително намален.
