Skip to content
Загреб стана првиот европски град во кој целосно автономни роботакси возат со патници по јавни улици без безбедносен оператор во возилото. Компаниите Verne и Pony.ai почнаа тестирање на системот на траса долга 22 километри, од деловната зона Бузин до аеродромот „Фрањо Туѓман“.
Станува збор за тест-фаза, а не за целосно отворена комерцијална услуга без возач. Verne уште од април нуди автономни возења во Загреб, но досега во автомобилите имаше оператор кој можеше да ја преземе контролата. Новата фаза го отстранува човекот од возачкото место.
Компаниите соопштија дека автономните рути во следните месеци постепено ќе се прошируваат, со цел системот да ја покрие целата планирана оперативна зона во Загреб. Тестирањата се спроведуваат со одобренијата потребни според хрватските прописи за автономни возила со патници на јавни патишта.
Возилата ја користат седмата генерација на системот Robotaxi на кинеската Pony.ai. Технологијата вклучува сензори со покриеност од 360 степени, повеќекратни резервни системи и платформа за автономно управување од четврто ниво, односно возење без човечка интервенција во однапред определени услови и области.
Од почетокот на комерцијалната услуга во април, флотата во Загреб поминала повеќе од 200.000 километри и реализирала неколку илјади возења со корисници. Просечната оценка од патниците, според компаниите, е 4,7 од 5.
Во проектот учествува и Uber. Pony.ai ја обезбедува технологијата за автономно управување, Verne е сопственик и оператор на флотата, а Uber ја интегрира услугата во својата апликација. Автономни возења преку Uber во Загреб се достапни од август, но досега со оператор во возилото.
Pony.ai и Uber веќе најавија план за повеќе од 2.000 роботакси во Европа. Загреб е првиот пазар на кој моделот се тестира во целосно автономна форма, а компаниите планираат проширување и во други европски градови.
Со тоа Хрватска практично стана европски полигон за технологија која во Кина и САД веќе се користи комерцијално, но во поголем дел од Европа сè уште е во фаза на тестирање и регулаторно одобрување.
