Skip to content
Грција го отвори Athens LifeTech Park во Спата, во близина на Атина, инвестиција од 80 милиони евра со која земјата сака да изгради нов центар за биотехнологија, развој на лекови и стартап-компании. Комплексот на фармацевтската компанија ELPEN обединува биотехнолошки инкубатор, истражувачки лаборатории и инфраструктура за претклинички и транслациски истражувања, а е отворен и за компании и научни тимови од странство.
Паркот беше официјално претставен на 10 септември во присуство на грчкиот премиер Киријакос Мицотакис и претставници на владата. Грчките власти и ELPEN го претставуваат како прв интегриран биотехнолошки парк од ваков тип во Југоисточна Европа.
Биотехнолошкиот инкубатор располага со околу 1.000 квадратни метри лабораториски и канцелариски простор за млади компании. Стартапите можат да користат приватни и заеднички лаборатории, научна инфраструктура, менторска поддршка и контакти со инвеститори, без инкубаторот автоматски да бара сопственички удел во нивните компании.
Посебен сегмент од околу 1.500 квадратни метри е наменет за претклинички и транслациски истражувања, со кои научните откритија треба да се доближат до фазата на клиничка валидација. Во комплексот има и образовен и конференциски центар со аудиториум за околу 300 лица.
Вредноста на проектот е 80 милиони евра. ELPEN и дел од грчките деловни медиуми наведуваат дека 72 милиони евра се сопствени средства, а осум милиони се обезбедени преку државни поттикнувања и помош. Министерот за развој Такис Теодорикакос, пак, изјави дека Министерството ја поддржува инвестициската програма на ELPEN со 14 милиони евра. Од јавно објавените информации не е целосно јасно дали целата сума се однесува исклучиво на Athens LifeTech Park или на поширокиот инвестициски план на компанијата.
И кај работните места засега нема објавена прецизна бројка само за новиот парк. Компанијата и грчката влада најавуваат отворање висококвалификувани позиции, но главниот тест за инвестицијата ќе биде дали новата инфраструктура ќе произведе патенти, нови медицински технологии и компании способни да излезат на меѓународниот пазар.
ELPEN веќе вложува повеќе од 15 проценти од годишниот промет во истражување и развој и извезува на повеќе од 90 пазари. Athens LifeTech Park е дел од поширок инвестициски план на компанијата вреден околу 380 милиони евра до 2030 година.
Проектот е интересен и за Македонија бидејќи инкубаторот не е ограничен само на грчки компании. Официјалната програма предвидува прием и поддршка за меѓународни тимови и стартапи, што во принцип ја остава отворена можноста и за македонски истражувачи и биотехнолошки компании.
Засега нема посебна програма за Македонија, ниту објавени специфични услови за домашни компании и научници. Реалната можност ќе зависи од критериумите за прием во инкубаторот и од евентуална директна соработка меѓу македонските универзитети, истражувачки центри и новиот биотехнолошки комплекс во Спата.
