Skip to content
„Кока-Кола“ влегува во голем инвестициски циклус во Соединетите Американски Држави, со план до 2030 година да бидат вложени 10 милијарди долари во нови и проширени производствени, дистрибутивни и деловни капацитети.
Инвестициите ќе се реализираат во периодот од 2026 до 2030 година и треба да опфатат модернизација на постојната инфраструктура, изградба на нови капацитети и проширување на мрежата за производство и дистрибуција во повеќе американски сојузни држави.
Веќе се најавени проекти во Калифорнија, Колорадо, Индијана, Алабама, Мичиген, Минесота, Флорида и Њујорк.
Сумата од 10 милијарди долари, сепак, не се однесува само на директните вложувања на матичната компанија „Кока-Кола“. Планот го опфаќа целиот систем на компанијата во САД, вклучително и независните партнери кои ги произведуваат, полнат и дистрибуираат пијалаците.
Претседателот и финансиски директор на компанијата, Џон Марфи, посочи дека значителен дел од инвестициите ќе дојде токму од партнерите за полнење, кои вложуваат во фабрики, опрема, транспорт и дистрибутивна инфраструктура.
За споредба, самата „Кока-Кола компани“ претходно прогнозираше капитални расходи од околу 2,2 милијарди долари за тековната фискална година, што покажува дека најавените 10 милијарди долари претставуваат многу поширок инвестициски пакет.
Големиот план беше објавен заедно со анализа за економското влијание на системот на „Кока-Кола“ во САД.
Според податоците што ги објави компанијата, системот во 2025 година придонел со околу 85 милијарди долари во американскиот бруто-домашен производ и директно и индиректно поддржувал речиси еден милион работни места.
Само во една година биле потрошени околу 37 милијарди долари кај американски добавувачи, меѓу кои земјоделски производители, компании за амбалажа, транспорт и други услуги.
„Кока-Кола“, нејзината фондација и Coca-Cola Scholars Foundation во истиот период вложиле и околу 177 милиони долари во програми наменети за локалните заедници.
Мрежата на компанијата во САД опфаќа повеќе од 70 производствени капацитети и стотици дистрибутивни центри, а американскиот систем работи со 61 партнер за полнење.
Според проценките на компанијата, економското влијание на системот надминува една милијарда долари во 25 американски сојузни држави.
„Кока-Кола“ наведува и дека 98 центи од секој долар потрошен за нејзините пијалаци во САД остануваат во американската економија преку домашното производство, вработувањето, набавките и дистрибуцијата.
Инвестицијата од 10 милијарди долари доаѓа во период кога големите американски компании засилено вложуваат во домашното производство, логистиката и синџирите за снабдување.
За „Кока-Кола“, која годинава одбележува 140 години од создавањето на пијалакот, новиот инвестициски циклус треба да обезбеди поголем производствен и дистрибутивен капацитет на еден од нејзините најважни пазари.
