Skip to content
Поранешниот директор на „Државна лотарија“ Перпарим Бајрами денеска првпат треба да седне на обвинителната клупа во процесот за злоупотребите во компанијата, откако на 9 септември самиот се пријави на граничниот премин „Блаце“ по повеќе од една година недостапност за органите на прогон.
Судењето во Основниот кривичен суд Скопје треба да продолжи во 12 часот. Претходните две рочишта, закажани за 11 и 16 септември, беа одложени за на Бајрами и неговата одбрана да им биде оставен законскиот рок од осум дена за да се запознаат со обвинителниот предлог и доказите.
Бајрами е првообвинет во предметот, а заедно со него на обвинителната клупа се поранешниот вицепремиер Артан Груби, поранешниот генерален секретар на Владата Методија Димовски и уште пет лица поврзани со раководните и надзорните структури на „Државна лотарија“.
Сите се обвинети како соизвршители за злоупотреба на службената положба и овластување. Обвинителството тврди дека во текот на 2023 и 2024 година ги пречекориле своите овластувања при постапката за самостојно приредување електронски игри на среќа и набавката на видеолотариски терминали.
Според обвинителниот предлог, „Државна лотарија“ немала право самостојно да приредува електронски игри на среќа преку видеолотариски терминали, бидејќи тоа право уште во 2013 година го вложила како непаричен влог при основањето на „Државна видеолотарија – Casinos Austria“, за што добила 51 процент од уделот во друштвото.
Обвинителството тврди дека Бајрами, како генерален директор и претседател на Управниот одбор, во мај 2023 година доставил до Владата информација со која било побарано „Државна лотарија“ да започне самостојно да приредува електронски игри и да спроведе набавка на видеолотариски терминали.
Според обвинителната теза, тогашниот генерален секретар на Владата Методија Димовски ја ставил информацијата на владина седница, а Груби, кој претседавал со седницата во својство на Собрание на „Државна лотарија“, предложил таа да биде усвоена иако таквата одлука, според обвинителството, не била во надлежност на Владата.
Потоа членовите на Надзорниот одбор го одобриле започнувањето на постапката за набавка на терминалите, иако обвинителството тврди дека законската процедура не била испочитувана.
Во обвинителниот предлог од август првично беше наведена штета од 507,6 милиони денари, односно околу 8,2 милиони евра. По дополнително вештачење, во судската постапка се појави износ од 596,1 милион денари, или околу 9,7 милиони евра.
Судскиот процес започна на 24 август без Бајрами. Останатите обвинети што беа присутни се изјаснија дека не се чувствуваат виновни, додека Башким Авдиу побара обвинението да му биде доставено на албански јазик бидејќи изјави дека не го разбира во целост.
Бајрами на 9 септември во 5:35 часот сам се пријави на граничниот премин „Блаце“, по што беше спроведен во затворот „Скопје“ за издржување на претходно определената мерка притвор. За него претходно беше распишана меѓународна потерница.
Покрај овој предмет, Основното јавно обвинителство Скопје води уште четири други постапки против поранешниот директор на „Државна лотарија“ за сомнение за истото кривично дело, во кои сè уште се прибираат докази и се вршат вештачења.
Денешното рочиште е прво на кое Бајрами треба лично да учествува откако судењето веќе беше започнато во негово отсуство.
