Skip to content
Поранешниот директор на „Државна лотарија“ Перпарим Бајрами денеска првпат се изјасни пред судот за предметот во кој обвинителството тврди дека на компанијата ѝ била нанесена штета од околу 9,7 милиони евра. Бајрами рече дека го разбира обвинението и дека не се чувствува виновен.
Тој беше спроведен од затворот во Шутка во Основниот кривичен суд Скопје, девет дена откако на 9 септември сам се пријави на граничниот премин Блаце и по околу 19 месеци стана достапен за органите на прогонот. Бајрами беше недостапен од декември 2024 година.
Во судницата се сретна и со поранешниот вицепремиер Артан Груби, кој исто така е обвинет во предметот. Според „Слободен печат“, двајцата се поздравиле при нивното прво видување откако се вратиле во Македонија. Груби претходно се изјасни дека не е виновен.
За невин денеска се изјасни и Башким Авдиу, кој на претходното рочиште побара обвинителниот предлог и дел од доказите да му бидат доставени на албански јазик. Со тоа сите осуммина обвинети во предметот се изјаснија дека не се виновни.
На Бајрами повторно му беше прочитан обвинителниот предлог, бидејќи не беше присутен кога започна судењето. На денешното рочиште одбраната почна да ги најавува доказите што ќе ги предлага, меѓу кои владини одлуки, а како сведок е предложен и актуелниот директор на „Државна лотарија“, Александар Климовски.
Основното јавно обвинителство Скопје во август поднесе обвинителен предлог против осум лица како соизвршители за злоупотреба на службената положба и овластување. Според обвинителството, во текот на 2023 и 2024 година обвинетите презеле дејствија со кои ги пречекориле своите овластувања во врска со набавка на видеолотариски терминали и самостојно приредување електронски игри на среќа.
Обвинителството првично ја процени штетата на 507,6 милиони денари, односно околу 8,2 милиони евра, но во прецизираниот обвинителен предлог износот е зголемен на околу 596,1 милион денари, односно приближно 9,7 милиони евра.
Според обвинителството, „Државна лотарија“ немала право самостојно да приредува електронски игри на среќа преку видеолотариски терминали бидејќи тоа право во 2013 година било внесено како непаричен влог во заедничкото друштво со „Casinos Austria“, во кое државната компанија добила 51 отсто сопственички удел. Обвинителството тврди дека и покрај тоа биле донесени одлуки и спроведена јавна набавка за терминали.
Груби, според обвинителниот предлог, претседавал со владина седница на која била разгледувана одлуката поврзана со „Државна лотарија“. Тој и останатите обвинети ги отфрлаат обвиненијата и вината треба да биде утврдена во судската постапка.
Бајрами во моментов е во притвор, додека Груби е во куќен притвор. Скопското обвинителство, според СДК, води уште четири истраги против Бајрами за сомнежи за злоупотреба на службената положба, во кои се прибираат докази и се вршат вештачења.
