Skip to content
Лидерот на СДСМ Венко Филипче најави дека партијата писмено ќе ги извести највисоките претставници на Европската Унија за, како што тврди, „хибридна војна“ што во Македонија се води преку медиуми поврзани со Србија. Како примери ги посочи каналите „Арена“ и „Еуроњуз“, а ја обвини Владата дека молчи за нивното работење.
Филипче најави дека писма ќе бидат испратени до претседателката на Европската комисија Урсула фон дер Лајен, претседателот на Европскиот совет Антонио Кошта и еврокомесарката за проширување Марта Кос.
Според него, спорно е што дел од медиумските сервиси функционираат во Македонија преку сигнал што се реемитува од Србија, додека истовремено имаат ангажирани луѓе во земјата. Тој побара институциите да објаснат дали и според кои правила работат овие медиуми.
СДСМ и претходно отвораше прашања за влезот на српски медиумски компании на македонскиот пазар, како и за сопственичката и финансиската структура зад „Еуроњуз Србија“. Филипче на 14 септември изјави дека партијата ја следи постапката во АВМУ и дека за случувањата ги информира стратешките партнери на Македонија.
Сепак, тврдењето дека конкретните медиуми работат незаконски не е потврдено од медиумскиот регулатор.
Агенцијата за аудио и аудиовизуелни медиумски услуги во август ги отфрли како неточни и неосновани критиките поврзани со статусот на програмските сервиси Arena M1, Arena M2 и Arena M3 Premium. Според АВМУ, тие се третираат како странски програмски сервиси што се реемитуваат во Македонија, бидејќи нивниот изворен сигнал не се емитува од територијата на земјата. Регулаторот тогаш тврдеше дека постапувањето е во согласност со законот и дека нема основа за тврдењата дека овозможува заобиколување на законските обврски.
Поврзаноста на „Еуроњуз Србија“ со српскиот државен телекомуникациски систем, пак, е јавно документирана. Според регистарот на српското Регулаторно тело за електронски медиуми, телевизијата ја издава Arena News Channels, која е 100 проценти во сопственост на Arena Channels Group. Самата група е дел од „Телеком Србија“.
Поширокото прашање за странското медиумско влијание во Македонија веќе е забележано и во документи на Европскиот парламент. Во резолуцијата за Македонија се наведува дека земјата останува цел на операции на странско малигно влијание и дека дел од медиумите на српски јазик функционираат како регионални засилувачи на наративи поврзани со Кремљ и анти-ЕУ пораки. Во документот се споменуваат и руски државно поврзани актери кои преку српски медиумски посредници ширеле пораки против НАТО и ЕУ.
Тоа, сепак, не значи дека Европскиот парламент ги означил конкретно „Арена“ или „Еуроњуз Србија“ како носители на такви операции. Таква директна констатација за овие два медиуми нема во цитираниот документ.
Филипче денеска дополнително ја поврза темата со вицепремиерот Иван Стоилковиќ и најави интерпелација против него. Лидерот на СДСМ изнесе и политички обвинувања дека Владата работи во корист на странски интереси и дека премиерот Христијан Мицкоски е „руски прокси играч на Балканот“. Станува збор за политички оценки на Филипче за кои тој во изјавата не презентираше докази што би ги потврдиле како утврдени факти.
