Skip to content
Шест лица се приведени, а против вкупно осуммина е поднесена кривична пријава по полициската акција за сузбивање група осомничена за криумчарење лекови, суплементи, цигари и тутун, како и за поткуп, избегнување акциза и перење пари.
Акцијата била спроведена на 21 септември под раководство на Основното јавно обвинителство за гонење организиран криминал и корупција. По наредби на Основниот кривичен суд во Скопје биле извршени претреси на повеќе локации во Скопје, Тетово и Гевгелија.
При претресите полицијата пронашла и одзела повеќе од 100.000 евра, 16 плочки со златна боја, цигари и тутун без акцизни маркички, поголемо количество лекови и суплементи за кои постои сомнение дека биле нелегално внесени во земјата, мобилни телефони и други предмети.
Единицата за финансиски криминал поднела кривична пријава против шест македонски и двајца турски државјани. Тие се осомничени за повеќе кривични дела, меѓу кои криумчарење, прикривање стоки што се предмет на криумчарење, избегнување плаќање акциза, примање и давање поткуп, производство и пуштање во промет штетни средства за лекување и перење пари.
Според сомневањата на истрагата, во периодот од 2024 до 2026 година првоосомничениот, 52-годишен жител на Тетово, го организирал нелегалното внесување, складирање и препродавање цигари и тутун.
МВР тврди дека преку поткупување царински службеник, членовите на групата непречено пренесувале акцизни производи преку царинската линија, без пријавување и плаќање на законските давачки. На ист начин, според полицијата, во земјата биле внесувани лекови и суплементи наменети за понатамошна продажба.
Со избегнувањето царински давачки, акциза и данок на додадена вредност, на државниот буџет наводно му била причинета материјална штета во значителен износ. Точната вредност на штетата не е наведена во соопштението.
Од МВР додаваат дека дел од лековите и суплементите биле пуштени во продажба без потребно одобрение, упатство и лекарски рецепт, со што, според сомневањата, била создадена опасност за здравјето на луѓето.
Кривичната пријава е доставена до Обвинителството за гонење организиран криминал и корупција, кое треба да одлучува за натамошниот тек на постапката. Осомничените се сметаат за невини до донесување правосилна судска пресуда.
