Skip to content
Иран со закана до САД порача дека неговите вооружени сили се целосно подготвени за нова воена конфронтација и дека Вашингтон ќе претрпи уште поголема штета доколку повторно ја нападне земјата. Предупредувањето го упати воениот портпарол Мохамад Акрамнија, откако американскиот претседател Доналд Трамп го отфрли иранскиот предлог за отворање на Хормушкиот Теснец и прекин на борбите.
Акрамнија во неделата изјави дека иранската војска е подготвена за секое можно обновување на американските напади. Тој не соопшти каков би бил одговорот на Техеран, но предупреди дека последиците за САД би биле потешки отколку при претходните судири.
Одделно се огласи и началникот на Генералштабот на иранската армија, Амир Хатами, кој оцени дека војната влегла во „критична и одлучувачка фаза“.
Хатами порача дека Техеран нема да прифати ситуација во која на Иран му е оневозможено да тргува, додека странските сили продолжуваат да ги користат стратешките поморски патишта во регионот.
„Ако Иран не може да тргува, ако Иран не може да живее, никој нема да може ниту да тргува ниту да живее. Хормушкиот Теснец е теснец на нашето достоинство и чест. Нема да им дозволиме на непријателите да ја користат оваа клучна логистичка точка додека иранскиот народ е лишен од тоа“, изјави Хатами.
Техеран претходно понуди да го отвори Хормушкиот Теснец во рок од седум дена доколку САД го намалат воениот притисок и ја укинат блокадата на иранските пристаништа. Иранските власти тврдеа дека предлогот бил доставен преку посредници и дека нивната делегација во Њујорк имала овластување да разговара за дипломатско решение.
Трамп го отфрли предлогот, по што иранскиот воен врв ја засили реториката и повторно го поврза слободното движење низ Хормушкиот Теснец со можноста Иран да извезува и да тргува.
Хормушкиот Теснец е еден од најважните светски поморски патишта за транспорт на нафта и гас. Неговото затворање или ограничување директно влијае врз снабдувањето со енергенси, цените на нафтата и безбедноста на бродскиот сообраќај во Персискиот Залив.
