Кај скопјанец најдени бомба и два пиштоли, клуч од мотор се поврзува со убиство

Основното јавно обвинителство Скопје отвори истрага против 33-годишен скопјанец откако при претрес во неговиот дом биле пронајдени рачна бомба, два пиштоли, 240 куршуми, марихуана и клуч од мотор за кој постојат оперативни сознанија дека бил користен при извршување убиство.

Против осомничениот се води истрага за неовластено изработување, држење, посредување и тргување со оружје или распрскувачки материи, како и за неовластено производство и пуштање во промет на наркотични дроги.

При претресот била пронајдена рачна бомба М75 со шрапнелско дејство, како и 240 куршуми од различен калибар.

Полицијата запленила и пиштол „Црвена Застава“ калибар 7,65 милиметри со седум куршуми во рамката, како и пиштол „Берета“ со шест куршуми.

Во домот биле пронајдени и околу седум грама марихуана.

Особено внимание во истрагата привлекува пронајдениот клуч од мотор. Според Обвинителството, постојат оперативни сознанија дека моторот бил користен при извршување кривично дело убиство.

Засега не е соопштено за кое убиство станува збор, ниту дали осомничениот се поврзува директно со неговото извршување.

Надлежниот јавен обвинител побарал притвор за 33-годишникот поради опасност од бегство и можност да повтори кривично дело.