СДСМ бара уште 10 денари за килограм ориз, откупната цена падна на 16 денари

СДСМ бара дополнителна финансиска поддршка од 10 денари за секој килограм произведен и откупен ориз и повика владејачкото мнозинство да го поддржи предложеното законско решение.

Заменик-претседателката на СДСМ, Фани Каранфилова Пановска, денеска од Горни Подлог, Кочанско, изјави дека оризопроизводителите се соочуваат со ниски откупни цени и зголемени производствени трошоци.

Според неа, оризот што се откупува во моментов се плаќа по 16 денари за килограм, а дел од производителите воопшто немаат обезбеден откуп.

Каранфилова Пановска тврди дека ваквата цена не ги покрива трошоците за нафта, ѓубрива и механизација.

Таа направи споредба со 2021 година, кога, според податоците што ги изнесе, откупната цена достигнувала 42 денари за килограм.

СДСМ минатата недела поднел предлог-закон во Собранието со кој се предвидува дополнителна поддршка од 10 денари за килограм произведен и откупен ориз.

Од партијата велат дека целта е земјоделците да обезбедат средства за следната сеидба и да го продолжат производството.

Каранфилова Пановска го повика владејачкото мнозинство да го поддржи предлогот, а потребните средства да бидат обезбедени со најавениот ребаланс на Буџетот.

Од СДСМ предупредуваат дека без дополнителна поддршка дел од оризопроизводителите би можеле да се откажат од производството следната година.