Skip to content
Нови пожари во Тирана ја одбележаа вечерва, 15 октомври, третата последователна дневна мобилизација на студентите и средношколците. Дел од демонстрантите запалиле киоск во центарот на албанската престолнина, а огнот зафатил и автобуска постојка, објави „Коха јоне“.
Според медиумот, киоскот се наоѓа спроти поранешниот хотел „Дајти“, додека автобуската постојка е во близина на мостот кај Блоку. Во извештајот објавен во 19:26 часот нема информации за повредени лица во овие два пожара.
Претходно, „Евроњуз Албанија“ извести дека дел од учесниците запалиле подвижен киоск спроти Пирамидата. Демонстранти се собирале на булеварот во тој дел од градот, додека полицијата поставила кордон пред зградата на Владата.
Инциденти се регистрирани и во текот на попладнето. Телевизијата А2 извести за запалена автобуска постојка покрај Националниот историски музеј, од која пламенот се проширил кон околните дрвја. Во други делови од центарот биле оштетени излози, семафори и киосци, а на повеќе улици бил блокиран сообраќајот.
Полицијата употребила солзавец и водени топови при судирите со демонстрантите. Протестите се проширија и во Драч, Елбасан, Скадар и Корча. Учесниците бараат подобри услови на универзитетите, поголема поддршка за студентите и оставка од премиерот Еди Рама, посочувајќи ги високите школарини меѓу причините за незадоволството.
Поради инцидентите, јавниот превоз во Тирана и Камза бил привремено прекинат, а затворена била и Тиранската тврдина. Рама ги отфрли барањата за оставка, порачувајќи дека власта се менува на избори.
