Skip to content
Звуците на познатата антифашистичка песна „Бела чао“ се слушаа на улиците на Атина, каде што илјадници ученици, студенти и наставници излегоа на протест. Демонстрации се одржуваат и во други грчки градови, со барања за подобри услови во образованието, повисоки плати и мерки против растечките трошоци за живот.
Во Атина, демонстрантите маршираа низ центарот на градот, носејќи транспаренти и извикувајќи пароли за достапно образование и подобар животен стандард. Според грчките медиуми, полицијата распореди засилени сили за обезбедување на протестите, а во утринските часови имало и приведувања.
Протестите се придружени со штрајк во образованието. Наставниците бараат повисоки плати, пополнување на испразнетите работни места и поголеми инвестиции во училиштата, додека студентите предупредуваат дека високите кирии и трошоците за студирање стануваат сè поголем товар за нивните семејства.
Уште вчера, групи студенти поставија шатори на плоштадот Синтагма во Атина, протестирајќи против станбената криза и високите трошоци за живот. Слични активности беа организирани и во Солун.
Протестни маршеви се одржуваат и во Солун, Патра и други градови. Според грчката јавна телевизија ЕРТ, демонстрациите во Солун и Патра минуваат без поголеми инциденти, додека во Атина дел од централните улици се затворени за сообраќај.
Грчките протести се одржуваат во период на пошироки социјални и студентски мобилизации во Европа. Во изминатите денови протести имаше и во Франција, Италија, Белгија и Албанија, со различни непосредни причини, но и со заеднички теми како трошоците за живот, образованието и незадоволството од јавните политики.
За демонстрантите во Грција, образованието е една од главните причини за излегување на улица, но незадоволството се однесува и на економската сигурност на младите. Високите кирии, ниските приходи и растечките трошоци за секојдневниот живот дополнително ги засилуваат барањата за конкретни владини мерки.
