Skip to content
На нов ценовен удар врз семејните буџети од почетокот на 2027 година предупреди потпретседателката на СДСМ, Јована Тренчевска, на прес-конференција на 22 октомври, обвинувајќи ја Владата дека одбива повисока минимална плата.
Таа предупреди на можни повисоки сметки за струја и парно, посочувајќи го барањето на МЕПСО за зголемување на тарифата за пренос на електрична енергија од јануари.
Според бројките што ги изнесе Тренчевска, животните трошоци од јануари пораснале за 4.000 денари. Октомвриската потрошувачка кошничка, наведе таа, надминува 70.000 денари, а со трошоците за кирија достигнува над 90.000 денари.
„Граѓаните имаат крпен живот, одат на работа, вложуваат труд, а сѐ повеќе осиромашуваат“, изјави Тренчевска.
Таа наведе дека околу 180.000 од 540.000 вработени примаат помалку од 31.200 денари месечно, додека минималната плата останува на околу 26.000 денари.
Тренчевска го обвини премиерот Христијан Мицкоски дека го одбива барањето за минимална плата од 600 евра. Според неа, ниту новиот ребаланс на буџетот предвидува такво зголемување или мерки за заштита на стандардот.
Тренчевска ги критикуваше и најавите за ангажирање работници од странство, оценувајќи дека Владата бара евтина работна сила наместо да ги зголеми примањата на домашните работници. Според неа, одбивањето повисока минимална плата претставува свесен политички избор, а не неизбежна економска состојба.
Во критиките за ребалансот таа ја вклучи и поддршката за земјоделците, тврдејќи дека нема дополнителна помош за нив. Наспроти тоа, Тренчевска посочи на долговите и високите камати, предупредувајќи дека товарот од таквата буџетска политика ќе го понесат граѓаните и идните генерации.
