Skip to content
Мече угина по удар од автомобил на автопатот од Скопје кон Тетово, а случајот откри и институционална празнина: тимот за брзи интервенции во вакви ситуации сѐ уште не е официјализиран. На тоа предупреди Државниот инспекторат за животна средина по несреќата во петокот, 23 октомври, кај патарината Глумово, за која информациите беа објавени вчера.
Според инспекторатот, животното тежело меѓу 60 и 70 килограми и по ударот давало знаци на живот. Центарот за управување со кризи го известил инспекторатот, а информацијата била споделена во вибер-групата на интервентниот тим. Истовремено била контактирана Зоолошката градина во Скопје.
На терен пристигнал Сашо Панчев од ЗОО Скопје, но мечето веќе не давало знаци на живот. Телото потоа било пренесено на Факултетот за ветеринарна медицина при УКИМ за обдукција. Инспекторатот нагласил дека е итно потребно официјализирање на тимот, согласно Стандардната оперативна процедура.
МВР потврди дека во животното удрил автомобил „волво“, управуван од 36-годишен жител на Гостивар. Според полициските информации, случајот бил пријавен околу 22:15 часот, а увид извршила екипа на СВР Скопје.
Отворено е и прашањето како животното стигнало на коловозот. Дел од медиумите посочуваат дека автопатот треба да биде обезбеден со заштитна жичена мрежа. ТВ21, пак, нагласува дека нема потврдена информација дали на конкретното место мрежата недостасувала или била оштетена. Самото присуство на животното на автопатот не ја утврдува причината за неговото навлегување.
