Skip to content
Силното невреме „Агнета“ ја погоди Грција со поројни дождови, грмежи и локални поплави, поради што властите прогласија црвено предупредување за повеќе региони, затворија училишта и испратија итни известувања до граѓаните. Во вторникот, 3 ноември, најголема опасност беше најавена за источна Македонија, Тракија, Тасос, Самотраки и островите во североисточниот дел на Егејското Море. Невремето предизвика и привремен прекин на сообраќајот на дел од автопатот Егнатија кај Кавала, што е особено важно за македонските граѓани кои патуваат кон северна Грција.
Според ажурираниот билтен на грчката Национална метеоролошка служба, црвеното предупредување за опасни временски појави важеше до попладневните часови на 3 ноември. Најсилните дождови и грмежи беа прогнозирани за источна Македонија и Тракија, вклучувајќи ги Тасос и Самотраки, како и за Лемнос, Агиос Ефстратиос и Лезбос.
Портокалово предупредување беше издадено за Епир, западна Средна Грција, делови од Пелопонез, источниот Егеј и Додеканезите. На одредени места постоеше и можност невремето да биде проследено со град.
Поради опасните временски услови, локалните власти донесоа одлуки за затворање на училиштата на Тасос, Крф, Лемнос и Родос.
На Тасос беше прекината наставата со физичко присуство во сите основни и средни училишта, како и работата на градинките и установите за згрижување деца. Градоначалникот Елефтериос Киријакидис ја донесе одлуката по предупредувањето за интензивни врнежи и грмежи.
На Лемнос беа затворени и установите за дневна грижа за повозрасни лица, додека на Родос превентивната мерка ги опфати училиштата, предучилишните установи и дел од другите јавни активности.
Грчката Цивилна заштита испрати предупредувачки пораки преку системот 112 до жителите на повеќе погодени подрачја, со препорака да ги ограничат непотребните движења и да ги следат упатствата на надлежните служби.
Невремето веќе предизвика сериозни последици на Родос. Според грчката државна телевизија ЕРТ, поројните дождови поплавиле домови и деловни објекти, а надојдената вода однела и оштетила десетици автомобили, особено во областа Архангелос. Поради поплавувањата биле потребни интервенции на спасувачките служби.
Проблеми во сообраќајот имаше и во северна Грција. Грчката полиција во вторникот наутро го прекина движењето на возилата на дел од автопатот Егнатија, меѓу клучките Мустени и Галепсос, во насока од Кипи кон Игуменица, поради наноси од материјал на коловозот предизвикани од силните дождови.
Подоцна, полицијата официјално соопшти дека ограничувањето е укинато и дека сообраќајот на делницата е нормализиран.
Грчките власти предупредуваат дека при силни дождови не треба да се преминуваат поплавени патишта, речни корита и надојдени потоци. За време на грмежи треба да се избегнува престој на отворено, покрај море и под осамени дрвја.
