Skip to content
Изборот на новиот претседател на Универзитетското студентско собрание на УКИМ предизвика реакции кај студентите, откако иницијативата „Студентски отпор“ обвини дека постапката била спроведена нетранспарентно и го доведе во прашање легитимитетот на изборот. Дополнително, увидот во јавно достапниот Статут на Собранието покажува дека за избор на претседател е предвидено мнозинство од вкупниот број членови, односно најмалку 24 гласа, додека новиот претседател бил прогласен за избран со 21.
За нов претседател на Универзитетското студентско собрание е прогласен Адам Стојановски, студент на Природно-математичкиот факултет, кој освоил 21 глас. Неговиот противкандидат, Никола Манев од Технолошко-металуршкиот факултет, добил пет гласа.
Според „Студентски отпор“, изборот на лицето што треба да ги застапува интересите на студентите на најголемиот универзитет во државата се одвивал без соодветно информирање на студентската јавност. На седницата, според нивните наводи, присуствувале 26 од вкупно 46 делегати.
Статутот предвидува 24 гласа за избор на претседател
Рацин.мк изврши увид во Статутот на Универзитетското студентско собрание, објавен во „Универзитетски гласник“, број 670 од 8 јануари 2024 година.
Во член 14 е наведено дека Собранието може да работи и да одлучува доколку се присутни повеќе од половината од вкупниот број членови, додека редовните одлуки се донесуваат со мнозинство од присутните.
Но, истиот член содржи посебна одредба за изборот на претседател:
„По исклучок на став 1 од овој член, изборот и разрешувањето на претседателот е со мнозинство од вкупниот број членови на Универзитетското студентско собрание.“
Според член 16, Собранието брои 46 претставници, што значи дека за избор на претседател се потребни најмалку 24 гласа.
Со присуството на 26 делегати бил исполнет условот за кворум, но Статутот прави разлика меѓу кворумот за одржување седница и мнозинството потребно за избор на претседател.
Доколку оваа одредба останала непроменета, 21 глас не се доволни за избор на претседател.
„Студентски отпор“ ги оспорува и мандатите на делегатите
Во реакцијата, студентската иницијатива наведува дека изборите за факултетските студентски собранија сè уште не биле завршени на сите факултети, поради што го доведува во прашање легитимитетот на дел од претставниците што учествувале во гласањето.
Според „Студентски отпор“, дел од делегатите имале истечени мандати, а новите претставници сè уште не биле избрани.
Иницијативата го поставува и прашањето дали по завршувањето на изборите на сите факултети ќе биде потребно повторно да се спроведе избор за претседател на Универзитетското студентско собрание.
Дополнително, „Студентски отпор“ тврди дека од работата на Собранието биле исклучени делегати кои дипломирале, но веднаш продолжиле со постдипломски студии на истиот факултет.
Според нив, Статутот предвидува можност за продолжување на мандатот во такви околности, но делегатите биле исклучени без формална одлука, писмено образложение или претходно известување.
Овие наводи засега не се независно потврдени со официјалната документација на Универзитетското студентско собрание.
Кој го избрал претставникот на студентите?
„Студентски отпор“ реагира и на недоволната транспарентност на изборната постапка, наведувајќи дека студентите немале соодветен увид во начинот на избор на нивниот претставник.
Иако иницијативата укажува на недостапност на документите, Статутот од 2024 година е објавен на официјалната веб-страница на Правниот факултет при УКИМ.
Во него е предвидено работата на Универзитетското студентско собрание да биде јавна, а студентите редовно да бидат информирани за неговите акти и одлуки.
Дополнително, Статутот на УКИМ од 2019 година предвидува Универзитетското студентско собрание да има сопствен Статут, кој се донесува по претходна согласност на Универзитетскиот сенат.
За целосно расчистување на спорните прашања потребно е да се утврди дали постојат понови измени на Статутот на УСС, колку делегати имале важечки мандат и што е наведено во записникот и одлуката за избор на претседател.
Реакцијата на „Студентски отпор“, заедно со одредбите од јавно достапниот Статут, отвора конкретни прашања за почитувањето на изборната постапка.
Од Универзитетското студентско собрание и од раководството на УКИМ се очекува појаснување дали член 14 од Статутот е сè уште во сила, колку членови со важечки мандат имало Собранието и врз која основа кандидат со 21 глас бил прогласен за претседател.
Додека не бидат објавени изборната документација и евентуалните измени на Статутот, останува неразјаснето дали новиот студентски претседател го добил мнозинството што го пропишуваат правилата на Собранието.
