Skip to content
Глобалната температура оваа година речиси сигурно ќе го надмине прагот од 1,5 степени Целзиусови во споредба со прединдустрискиот период, соопшти европската служба за климатски промени Коперникус. Со тоа 2026 година станува втората најтопла година откако постојат мерењата, веднаш зад рекордната 2024 година.
Според статистичкиот модел на европската служба, веројатноста просечната температура на Земјата годинава да ја надмине границата од 1,5 степени изнесува повеќе од 99 проценти. Проценките покажуваат дека глобалното затоплување во текот на 2026 година ќе се движи помеѓу 1,56 и 1,61 степени над прединдустрискиот просек од периодот 1850-1900 година.
Научниците наведуваат дека постои и приближно 20 проценти веројатност до крајот на декември оваа година да го израмни или дури да го собори апсолутниот историски рекорд поставен пред две години.
Посебна загриженост предизвикува фактот што и четиригодишниот просек за периодот од 2023 до 2026 година ќе биде повисок од 1,5 степени во однос на прединдустриското ниво. Сепак, климатолозите напоменуваат дека неколку последователни екстремно топли години автоматски не значат трајно надминување на долгорочната цел утврдена со Парискиот климатски договор, бидејќи тој документ се однесува на повеќедецениски просек.
Податоците на Коперникус покажуваат и дека изминатиот октомври бил најтоплиот октомври регистриран на глобално ниво во историјата. Просечната температура на воздухот достигнала 15,35 степени Целзиусови, што е за 1,75 степени над прединдустрискиот просек.
Октомври воедно бил трет месец по ред во кој глобалната температура ја надминала критичната граница од 1,5 степени. Рекордни вредности се регистрирани и кај површината на светските мориња и океани надвор од поларните региони, каде што просечната октомвриска температура достигнала 20,95 степени Целзиусови.
