Меган Маркл се појави во Брисел по апсењето на татко ѝ и се откажа од говорот

Меган Маркл и принцот Хари на 10 ноември присуствуваа на настан за безбедноста на децата на интернет во Европскиот парламент во Брисел. Тоа беше првото јавно појавување на војвотката од Сасекс по апсењето на нејзиниот татко Томас Маркл. Портпарол на двојката за Ројтерс потврди дека таа се откажала од планираното обраќање. Говорот го одржа Хари.

Двојката присуствуваше на отворањето на „Lost Screen Memorial“, уметничка инсталација посветена на деца и млади што го загубиле животот по штетни искуства на социјалните мрежи. Хари зборуваше за одговорноста на технолошките компании и за поддршката на семејствата што загубиле деца. „Децата заслужуваат да се чувствуваат безбедно каде и да се“, рече тој.

Судот нареди процена дали Томас Маркл може да учествува во постапката

Американското Министерство за правда соопшти дека 82-годишниот Томас Маркл бил уапсен на 6 ноември во Флорида и дека се соочува со федерално обвинение за поседување материјал со сексуална злоупотреба на деца. Според обвинителството, ФБИ запленило материјали при претрес на две складишта што ги изнајмувал во областа на Лос Анџелес. Маркл претходно јавно ги негираше наводите.

По првото појавување пред судот во Тампа, судијката одобри Маркл да биде пуштен од притвор под услов да остане во домашен притвор со електронски надзор. Таа нареди и независна психијатриска процена за да се утврди дали тој може да ја разбере постапката и да учествува во својата одбрана.