Skip to content
На 4 ноември 1960 година, научното списание „Science“ објавило труд со наслов „Судниот ден – петок, 13 ноември 2026“. Веднаш под насловот стоел условот од кој зависела целата пресметка. Бројот на луѓе би се приближил до бесконечност ако населението продолжи да расте по истата крива како во претходните два милениума.
Хајнц фон Ферстер, Патриша Мора и Лоренс Амиот собрале 24 историски процени за бројот на луѓе на Земјата, од почетокот на нашата ера до 1958 година. Со тие податоци составиле модел во кој населението се удвојува во сè пократки интервали. Кога ја продолжиле кривата во иднината, таа станувала сè пострмна, а бројот на луѓе во равенката растел без граница.
Зошто токму петок 13?
Пресметката ги одвела до крајот на 2026 година, со отстапување од пет и пол години во двете насоки. За насловот авторите избрале конкретен ден. Тринаесетти ноември во 2026 паѓа во петок, а истиот датум бил и роденденот на Фон Ферстер. На тој ден би наполнил 115 години.
Што се случило со растот на населението?
Ако во равенката од 1960 година ја внесеме средината на 2020 година, добиваме околу 28,6 милијарди жители. Според процената на Обединетите нации, тогаш на Земјата живееле околу 7,9 милијарди луѓе.
Причината за разликата се гледа во стапката на раст. Во почетокот на 1960-тите светското население растело за повеќе од два отсто годишно. До 2020 година растот паднал под еден отсто. Во меѓувреме, просечниот број деца по жена во светот се намалил од околу 3,3 во 1990 година на 2,25 во 2024 година.
Според проекцијата на ОН од 2024 година, светското население ќе продолжи да расте уште неколку децении. Се очекува да достигне врв од околу 10,3 милијарди луѓе во средината на 2080-тите, а потоа постепено да се намалува.
