Студ и силен ветер ја пречекаа Македонија во Глазгов, утре дуел со Шкотска

Македонската фудбалска репрезентација пристигна во Глазгов, каде што утревечер ќе ѝ гостува на Шкотска во претпоследното коло од Лигата на нации. По речиси четиричасовното патување од Скопје, репрезентативците ги пречекаа значително постудено време и силен ветер.

Избраниците на Гоце Седлоски ќе ги завршат подготовките за натпреварот на „Хемпден парк“, закажан за петок, 13 ноември, во 20:45 часот по македонско време.

Македонија влегува во дуелот со четири порази во досегашните четири кола и гол-разлика 0:10. Гостувањето е нова можност за прв погодок и први бодови во овој циклус. Во претходната меѓусебна средба, одиграна на 3 октомври во Скопје, Шкотска победи со 2:0.

Селекторот Седлоски пред ноемвриските натпревари побара поголема дисциплина и ангажман, со акцент на исправување на грешките од претходните настапи.

„Од играчите барам да има трчање, желба и дисциплина во играта“, порача Седлоски.

По гостувањето во Глазгов, репрезентацијата се враќа во Скопје, каде што на 16 ноември ќе ја пречека Словенија во последното коло од групната фаза.