Францускиот претседател Емануел Макрон предупреди дека Русија достигнува „ново ниво“ на агресија, по нарушувања на воздушниот простор, сомнежи за саботажи и обид за атентат што го истражуваат европските безбедносни служби.
Во обраќањето во петокот, тој изрази солидарност со погодените земји и оцени дека постапките на Москва дополнително ќе ја зајакнат европската решителност и единство.
Предупредувањето следува откако полските власти соопштија дека две руски ракети и дрон со млазен погон паднале на полска територија, додека во земјата се одржувале сојузнички воени вежби.
Данската разузнавачка служба ПЕТ ги обвини руските служби за обид за атентат врз украинско-американски државјанин северно од Копенхаген во септември.
Естонија, пак, најави затворање на сите патни гранични премини со Русија од 1 декември, по обид за саботажа врз производител на дронови, кој Талин го поврзува со руското воено разузнавање ГРУ.
Макрон реагираше и по масовниот руски напад врз Украина ноќта меѓу четвртокот и петокот. Според извештајот, во Киев загинале најмалку седум лица, а биле оштетени важни мостови преку Днепар.
Украинскиот претседател Володимир Зеленски соопшти дека Русија употребила повеќе од 400 нападни дронови и над 110 ракети.

