Блинкен и Абас разговараа за напорите за враќање на смиреноста на Западниот Брег

Американскиот државен секретар Ентони Блинкен денеска во Рамалах оствари средба со палестинскиот претседател Махмуд Абас, пренесува Би-Би-Си.

Блинкен „ја потврди посветеноста на САД за испорака на хуманитарна помош за спасување животи и продолжување на основните услуги“ во Газа, според портпаролот на американскиот Стејт департмент.

Тој, исто така, јасно стави до знаење дека Палестинците „не смеат да бидат насилно раселени“, рече Метју Милер.

Блинкен и Абас разговараа за напорите за „враќање на смиреноста и стабилноста“ на Западниот Брег, вклучително и за потребата да се „запре екстремистичкото насилство врз Палестинците и да се повикаат на одговорност“, додаде тој.

Милер рече дека Блинкен повторил дека САД остануваат „посветени на унапредување на еднакви мерки на достоинство и безбедност за Палестинците и за Израелците“.

Блинкен, исто така, ја изрази посветеноста на САД да работат на „остварување на легитимните аспирации на Палестинците за формирање на палестинска држава“.

Подготви: Марта Пешевска (ЦивилМедиа)