Стихозбирката „Ѕвонливи тишини“ на Верица Мукоска добитник на наградата „Бели мугри“

Стихозбирката „Ѕвонливи тишини“ на вевчанката Верица Мукоска ја доби наградата „Бели мугри“ за најдобра поетска книга од автор до 35-годишна возраст, што ја доделува Домот на култура „Кочо Рацин“- Скопје.

Книгата ќе биде промовирана в петок во рамките на традиционалната манифестација „Денови“, која Домот на културата ја организира во чест на раѓањето на македонскиот поет и револуционер Кочо Рацин.

Верица Мукоска дипломирала на Филолошкиот факултет „Блаже Конески“ – Скопје при УКИМ, на катедрата за Македонска книжевност и јужнословенски книжевности, каде е запишана на постдипломски студии по Македонска книжевност. Првите стихови започнала да ги пишува во детството кога е објавена и нејзината детска стихозбирка: „Стихови од срцето на природата“ (2009).

Романот „Дневникот на длабоките тајни“ е нејзино прво прозно дело (2017), потоа следува романот „Равенка на стравот“ (2021), а потоа и стихозбирката „Тајнописец“ (2022). Делото „Психофилозофемите во повеќеслојните структури на романите Папокот на светот од Венко Андоновски и Еретички писма од Стефан Марковски (компаративна анализа)“ е нејзино прво книжевно дело од областа на книжевната наука и теорија (2023).