Skip to content
Украина ќе добие стотици дополнителни пресретнувачи во текот на следната година, помагајќи да се заштитат украинските градови од руски ракети и украинските трупи кои се соочуваат со нивните напади на фронтот, рече Бајден
Американскиот претседател Џо Бајден им посака добредојде на лидерите на НАТО во Вашингтон со моќен говор кој се чинеше дека е дизајниран да ги увери сојузниците во странство и дома дека може да го издржи изборниот предизвик на Доналд Трамп. Претседателот рече дека воената алијанса е „помоќна од кога било“, бидејќи се соочува со „клучен момент“ со војната меѓу Русија и Украина.
Предупредувајќи дека „автократите го срушија глобалниот поредок“, Бајден најави дополнителна воена помош за Киев. Планот за донација вклучува повеќе моќни американски системи за противвоздушна одбрана од типот „Патриот“, како и други системи за зајакнување на украинската ПВО. Донациите ги предводат Америка, Германија, Италија, Холандија и Романија.
„Украина ќе добие стотици дополнителни пресретнувачи во текот на следната година, помагајќи да се заштитат украинските градови од руски ракети и украинските трупи кои се соочуваат со нивните напади на фронтот“, рече Бајден.
Тој нагласи дека денес НАТО е посилен од кога било во својата историја и додаде „кога започна оваа бесмислена војна, Украина беше слободна земја. Денес таа е сè уште слободна земја и војната ќе заврши со тоа што Украина ќе остане слободна и независна земја. Русија нема да победи, Украина ќе победи“, рече Бајден.
Бајден зборуваше околу 13 минути со јасен глас, што е забележителна разлика од неговиот нејасен тон за време на минатомесечната претседателска дебата со Трамп. Белата куќа му дава заслуга на лидерството на Бајден за проширувањето на НАТО откако Русија ја започна инвазијата на Украина пред повеќе од две години. Оттогаш, Финска и Шведска се приклучија на алијансата.
Овој самит е историски за алијансата. Се одржува на истото место каде што беше потпишан првичниот договор, на кој Бајден се осврна во својот говор, пред неколку децении. Пораките и одлуките донесени на самитот би можеле да бидат клучни за Украина, која се соочува со невидени руски воздушни напади врз цивилни цели и инфраструктура.При крајот на својот говор, Бајден го повика генералниот секретар на НАТО Јенс Столтенберг на сцената за да му го врачи Претседателскиот медал на слободата, највисокото цивилно признание во Америка.
Во говорот подоцна во текот на ноќта, украинскиот претседател Володимир Зеленски ги повика американските политички лидери да не го чекаат исходот од претседателските избори во ноември за да ѝ помогнат на неговата земја.
„Сите го чекаат ноември. Американците го чекаат ноември, во Европа, Блискиот Исток, во Пацификот, целиот свет гледа кон ноември и, искрено кажано, и Путин го чека ноември. Време е да излеземе од сенките, да донесеме силни одлуки, да дејствуваме и да не го чекаме ноември или кој било друг месец“, рече Зеленски.
Зеленски рече дека не може да предвиди што ќе направи Доналд Трамп доколку биде избран за втор мандат за претседател на САД во ноември, додавајќи дека не го познава добро Трамп, но се надева оти поддршката на САД за Киев нема да се промени.
„Не го познавам многу добро. Не знам. Имав состаноци со него и добри средби кога беше претседател, но не ја поминавме војната со него“, додаде Зеленски.
Зеленски подоцна им се заблагодари на сојузниците на НАТО, кои ветија поголема воздушна одбрана за да ѝ помогнат на Украина да се одбрани од руски беспилотни летала и ракетни напади.
Јенс Столтенберг, генералниот секретар на НАТО во заминување, говорејќи непосредно пред Бајден, ја оправда континуираната поддршка на САД и Западот за Украина со тврдењето дека „најголемата цена и најголемиот ризик ќе биде ако Русија победи во Украина“.
Според Столтенберг, авторитарните лидери во Кина, Северна Кореја и Иран ќе се чувствуваат охрабрени доколку Русија го освои својот сосед, рече тој, опишувајќи ја војната како борба за вредностите.
„Сите тие ја поддржуваат бруталната војна на Русија. Сите тие сакаат НАТО да пропадне. Значи, исходот од оваа војна ќе ја обликува глобалната безбедност во наредните децении“, додаде шефот на НАТО.
Самитот минува во сенка на Трамп. Иако тој не беше присутен, многу од сојузниците се загрижени за иднината на НАТО доколку човекот, кој ја нарече Алијансата „застарена“ и се закани дека нема да ги брани тие земји, кои на даваат доволно пари за одбрана, победи на претседателските избори во САД во ноември.
