Доаѓа најсилниот топлотен бран за ова лето кон Македонија, прогноза по градови

Македонија од четврток влегува во нов период на многу топло време, а температурите ќе растат до сабота. Според актуелните метеоролошки модели, најтопло ќе биде во Скопската Котлина, Повардарието и југоисточните делови, каде дневните максимуми ќе се приближат до 40 степени.

Во Скопје во четврток се очекуваат околу 38 степени, а во петок температурата може да достигне 40 степени. Многу топло ќе остане и во текот на викендот, со максимални околу 39 степени. За скопскиот регион за четврток е активно и жолто предупредување за високи температури.

Силен топлотен бран истовремено го зафаќа и Балканот. Српскиот хидрометеоролошки завод предупредува дека од 20 до 25 август во централните и јужните делови од Србија локално се можни температури околу 42 степени.

Во Македонија, според сегашните модели, највисоки температури се очекуваат во петок и сабота. Велес може да достигне околу 39 степени, исто како и Гевгелија, додека во Штип и Струмица се прогнозираат до 38 степени.

Прогноза по градови за следните четири дена

На запад и југозапад температурите ќе бидат нешто пониски, но и таму ќе има значително затоплување. Во Охрид максималните ќе се движат од 32 до 34 степени, а во Битола до околу 36 степени.

Во делови од западна Македонија за време на викендот моделите покажуваат и можност за краткотрајна локална нестабилност, особено околу Тетово и Гостивар.

Прогнозите за температурите се моделски и може да претрпат помали корекции во следните денови.