Skip to content
На денешната меѓународна конференција на Социјалдемократскиот сојуз на Македонија и Корчуланската висока политичка школа, на која беше промовирана „Скопската иницијатива“, беше посочено дека социјалдемократите и прогресивците од регионот мора заеднички да одговорат на борбата против корупцијата и авторитарните режими, како и на потребата од интеграција на земјите од Западен Балкан во Европската Унија.
Во воведното обраќање претседателот на СДСМ, д-р Венко Филипче, истакна дека европската интеграција се соочува со сериозни предизвици и отпор од антиевропски структури.
„Антиевропските сили се поорганизирани од кога било досега и решени да ја одложат, ако не и целосно да ја спречат, европската интеграција. Криминалните мрежи, заштитени од ретроградните политички елити, најмногу стравуваат од реформите во владеењето на правото што ги носи европската интеграција. Успешната интеграција значително би ги ограничила сивите зони во кои тие денес функционираат. Повеќе од кога било, на нашиот регион му е потребна силна прогресивна коалиција – коалиција на социјалдемократски партии, прогресивни организации и поединци кои се подготвени да му се спротивстават на овој регрес“, рече Филипче.
Даша Шашиќ Шиловиќ од Корчуланската висока политичка школа, посочи дека земјите од Западен Балкан се соочуваат со сериозни предизвици на кои прогресивните сили мора обединето да одговорат.
„Се соочуваме и со корупцијата, но и со економските проблеми што ќе нè следат во иднина поради авторитарните режими што ги имаме денес. Некој еден ден ќе мора да ја плати сметката. За жал, најверојатно тоа ќе бидат помладите генерации. Друг проблем со кој се соочуваме, е одливот на мозоци. Како да им пристапиме на младите во регионот за да го спречиме овој процес? Повторно, мислам дека тоа мора да се направи на поиновативен начин. Мора да размислуваме надвор од вообичаените рамки. Токму затоа оваа можност и соработката меѓу сите нас може да стане простор и пат за такво размислување.“ рече Шашиќ.
Во однос на европската интеграција на Западен Балкан, Шашиќ Шиловиќ посочи дека европската перспектива на регионот е важна за Европската Унија и дека Западниот Балкан не е товар за ЕУ туку предност.
„Западниот Балкан не треба да биде и не е товар за Европа. Напротив, Западниот Балкан е и може да биде стратешка предност за Европа. Многу зависи од нас и од нашата отвореност и подготвеност да го покажеме тоа. Затоа европската интеграција не смее да се гледа само како бирократски процес, особено од наша перспектива како социјалдемократи и социјалисти“, рече Шашиќ Шиловиќ.
Воедно Шашиќ Шиловиќ додаде дека интеграцијата во ЕУ има и геополитичко значење, особено во овој период на геополитички преструктурирања.
„Таа мора да се сфати како геополитички императив и како трансформативна сила за регионот и неговите граѓани. Обединета и интегрирана Европа не е опција – таа е неопходност. Особено денес, во овие турбулентни времиња на глобални геополитички преструктурирања. Таа е неопходна за Европа затоа што ѝ носи дополнителна сила, поголема кохезија и поголема глобална релевантност. Ние ги имаме нашите вредности. Имаме визија. Затоа, заедно ја имаме моќта да размислуваме за нашата иднина, за визијата и промените што ги посакуваме за регионот, а со тоа и да придонесеме кон европските процеси. Токму тука треба да лежи нашата сила – во согледувањето на пошироката слика и во придонесот што можеме да го дадеме кон новите усогласувања и преструктурирања што денес ги гледаме и во Европа и во светот“, рече Шашиќ Шиловиќ.
На меѓународната конференција претседателот Филипче, говорејќи за европската интеграција на Македонија, посочи дека државата сега има историска шанса која не смее да ја пропушти и повика на заедничко дејствување и поддршка за продолжување на европскиот пат на државата.
„Немаме друга алтернатива освен да се поддржуваме меѓусебно и да работиме заедно, доколку сакаме нашите држави да останат на патот на прогресот, демократијата и социјалната правда. Имаме можност не само да исполниме една стратешка цел, туку и да го оствариме долгогодишниот сон на цела една генерација. За некои од нас, процесот на европска интеграција започна пред повеќе од 25 години. Денес тој влегува во нова и одлучувачка фаза, со реална и отворена можност за членство во Европската Унија, по години обележани со стагнација и неисполнети ветувања“, порача претседателот на СДСМ, Венко Филипче.
