Водата во Демир Капија небезбедна и за пиење и за готвење

Додека после еден месец Гостивар конечно доби вода за пиење, проблем со квалитетот со водата се јави во друга македонска општина.

Јавното комунално претрпијатие „Бошава“ од Демир Капија попладнево објави дека водата во водоводот на Демир Капија не е безбедна за пиење а ниту за готвење и истата не смее да се конзумира.

По добиените резултати од анализите на примероците земени во понеделник и вторник, од истото мерно место, добиени се различни резултати.

Анализата на примерокот земен во понеделник од страна на Институтот за јавно здравје – Скопје покажува дека водата не ги исполнува условите пропишани со правилникот за вода за пиење.

Од друга страна, анализата на примерокот земен во вторник од страна на центарот за јавно здравје – Велес покажува дека водата ги исполнува условите согласно правилникот за вода за пиење. Поради различните резултати, во понеделник ќе биде извршена супер анализа. Затоа, водата од водоводот во Демир Капија се забранува за пиење и подготвување на храна“ наведуваат од Јавното претпијатие.