Skip to content
Европската комисија презеде правни чекори во пет постапки против Бугарија поради нецелосно спроведување или прекршување на законодавството на Европската Унија во повеќе области – од заштита на личните податоци и даночната соработка до контролата на експлозивни материјали, енергетските услуги и управувањето со отпадот.
Постапките се дел од редовниот пакет прекршочни одлуки, преку кој Комисијата проверува дали државите членки правилно ги применуваат европските директиви и регулативи.
Во два случаи Софија добила образложено мислење, што претставува понапредна фаза во постапката, додека во другите три случаи ѝ биле испратени формални известувања со барање да ги отстрани утврдените недостатоци.
Бугарија не ги исполнила целите за рециклирање
Една од постапките се однесува на управувањето со отпадот. Според Европската комисија, Бугарија не ги исполнила обврзувачките цели за подготовка за повторна употреба и рециклирање на комуналниот отпад.
Европските правила предвидуваа до 2020 година најмалку 50 проценти од одредени материјали од отпадот од домаќинствата, како хартија, метал, пластика и стакло, да бидат подготвени за повторна употреба или рециклирани.
Комисијата оценила дека мерките преземени од бугарските власти не се доволни за целосно исполнување на оваа обврска, поради што е испратено образложено мислење.
Недостатоци во размената на даночни информации
Втората постапка се однесува на нецелосното пренесување на изменетите европски правила за административна соработка во областа на оданочувањето.
Овие правила треба да овозможат поефикасна размена на информации меѓу даночните администрации на земјите членки и да помогнат во откривањето даночно затајување, избегнување даноци и сомнителни финансиски трансакции.
Бугарија добила образложено мислење затоа што не ги вклучила целосно потребните одредби во националното законодавство.
Ограничувања за енергетските и градежните услуги
Комисијата отвори постапка и поради бугарските шеми за задолжително одобрување или сертифицирање компании и професионалци што вршат монтажа и градежни услуги поврзани со енергетиката.
Според Брисел, дел од овие барања може неоправдано да го ограничуваат пристапот на давателите на услуги од други земји членки до бугарскиот пазар.
Истата постапка опфаќа уште десет членки на ЕУ, меѓу кои Чешка, Шпанија, Хрватска, Кипар, Латвија, Литванија, Унгарија, Полска, Романија и Словачка.
Пропусти во контролата на прекурсорите за експлозиви
Европската комисија утврдила недостатоци и во примената на правилата за супстанциите што можат да се користат за незаконско производство на експлозиви.
Од Бугарија се бара да воспостави соодветни национални точки за пријавување сомнителни трансакции, исчезнувања и кражби, да ги определи надлежните органи, да обезбеди редовно ширење на упатствата и да воспостави ефикасни казни.
Постапка за ова прашање е поведена и против Полска.
Забелешки и за заштитата на личните податоци
Петтата постапка се однесува на примената на европската Директива за заштита на личните податоци што ги обработуваат полицијата и другите органи за спроведување на законот.
Комисијата смета дека Бугарија не ги исполнила целосно обврските за заштита на податоците при спречување, истрага и гонење кривични дела. Во оваа постапка се опфатени и Белгија, Чешка, Холандија, Полска и Словенија.
Бугарските власти имаат рок од два месеца да одговорат на забелешките и да ги отстранат утврдените недостатоци. Доколку одговорот не биде задоволителен, Комисијата може да ги продолжи постапките, а во нивната последна фаза и да ја изведе Бугарија пред Судот на правдата на Европската Унија.
